Yehiel Bouskila

يشيل بوسكيلة (مزيود ف 1921 ف قرية حدا مراكش، مات ف 1990 ف بير سبع ف إسرائيل) كاتب ؤ ؤستاد يهودي مغريبي. فاش كان صغير نتاقل معا واليديه ل كازا، ؤ قرا تماك ف مدراسة ميݣان داڤيد ؤ مدراسة كيتير تورا. ف 1938 ولّا ؤستاد د لعبرية ؤ تّاريخ ف مدراسة ميݣان داڤيد ؤ مدراسة إم هابانيم. ف 1946 بدا كيقري ف مدراسة تابعة ل لحتيلاف ليهودي لكوني ف كازا.

ف 1942، لجمعية د ميݣان داڤيد أسسات لجمعية لعبرية د كازا، لي ولا بوسكيلة رائيس ديالها. ؤ كان إيديتور ديال جّورنال خبارات على خوانينا، ف سّنوات لّخرة ديالو، ؤ لي كان كيصدر ب دّاريجة ليهودية، ؤ عندو توجه صهيوني. ملي ناضت لحرب د إسرائيل ف 1948، حبسو لأنشطة د لجمعية، ؤ ماعاودات تحلات تال 1952. لجمعية د لعبرية كانت كانضّم موسابقات ف لأداب لعبري كلا عام، لي كانو فيها موشاركين من لمغريب كامل. ب حوكم دّور ديالو ف لجمعية، بوسكيلة كانت عندو معرفة ب حاييم نحماني، لي هوّا لمؤسس ديال جّورنال خبارات على خوانينا.

ف 1944، كان نشر كتاب ب عنوان Toldot Ramba ve-Rashbi (تاريخ لحاخامات مائير ؤ شمعون) لي هوّا كتاب كيقدّم لّوغة لعبرية ؤ تّاريخ د ليهود ل لمغاربا ليهود لي ماكيعرفوهومش مزيان، ؤ مكتوب ب لعبرية معا طرجامة ب دّاريجة ليهودية. ف تّقديم ديال لكتاب، عطا نصائح ل لأساتدة د لعبرية ف ما كيتعلق ب لميطودولوجيا ؤ لأراء ديالو على تدريس لعبرية لحاديتة. لكتاب تّطبع ف لمطباعة د موشي عمار ف كازا.

ف 1950، كان شارك ف مؤتمر ديال لأساتدة د لعبرية ف لقدس، ؤ ف نفس لعام خدا ديپلوم من لجامعة لعبرية لي كاينة ف نفس لمدينة. دار عاداد د لأبحات لي نشرهوم ف جورنالات عيلمية ديال لعبرية. ف 1956، هاجر ل إسرائيل، ؤ ب سباب هادشي نيت تسدات لجمعية ؤ جّورنال. ستاقر ف بير سبع، لي بقا كيمارس فيها لمهنة ديالو كا ؤستاد د لعبرية. ف 1990 مات ؤ تّدفن ف نفس لمدينة.