Quick Facts
Biography
Walter Schlüter (* 14. März 1921 in Bremerhoben; † 27. Dezember 1989 in Oosterholt-Scharmbeek) weer en düütschen Politiker von de SPD.
Schlüter is 1921 in Bremerhoben boren un hett na de Volksschool op de Warft AG Weser en Lehr as Dreiher maakt. In’n Tweten Weltkrieg weer he von 1940 bet 1945 Soldaat bi de Kriegsmarien. Na’n Krieg hett he von 1946 bet 1960 as Beroopskraftfohrer arbeidt. Denn weer he Anstellten in de Verwaltung von de Stadt Oosterholt-Scharmbeek.
Schlüter güng 1945 in de SPD rin. He weer von 1952 bet 1960 un noch wedder von 1968 bet 1978 Raadsherr in’n Stadtraad von Oosterholt-Scharmbeek. Von 1957 af an weer he ok in’n Kreisdag von’n Landkreis Oosterholt un dor von 1972 bet 1981 Landraad. He hett 1972 den Vörsitt in’n Verwaltungsraad von de Oosterholter Kreisspoorkass övernahmen un weer von 1973 af an ok in’n Vörstand von’n Verband von de Överlandwarken Noord-Hannover. Von 1986 bet to sien Dood 1989 hett he dat Amt as Börgermeester von de Stadt Oosterholt-Scharmbeek övernahmen.
He hett dat Verdeenstkrüüz Eerste Klass von’n Verdeenstorden von de Bundsrepublik Düütschland kregen un ok dat Verdeenstkrüüz Eerste Klass von’n Neddersassischen Verdeenstorden.
Von’n 6. Juni 1967 bet 20. Juni 1982 weer Schlüter as direkt wählten Kannedaat för den Wahlkreis Oosterholt-Scharmbeek Maat von’n Landdag von Neddersassen (6. bet 9. Wahlperiood) un as Narücker noch en tweet Maal von’n 27. Juni 1985 bet 20. Juni 1986 (10. Wahlperiood). Von’n 28. Juni 1978 bet 20. Juni 1982 weer he Schriftföhrer in’n Landdag.
Schlüter weer verheiraadt un harr een Kind.