Victor Dennis Nierva

Si Victor Dennis T. Nierva (Kamundagan: 24 Pebrero 1980; Ama: Estelito Aguila Nierva; Ina: Grace Pacay Tino) sarong Bikolanong parasurat, paratokdo, kolumnista, aktor sa teatro, paradisenyo nin publikasyon asin sarong paratolod kan kulturang Bikolnon. Saro siya sa nangongorog na boses kan kontemporanyong literaturang Bikol.

Ipinangaki sa Syudad nin Naga, nagdakula sa Nierva sa mga riles kan Lupi, Camarines Sur. An tuninong asin mabukid na banwaan na ini na dinadalihigan kan sarong salog minalataw sa kadakol na rawitdawit ni Nierva; asin sa dakol na pagkakataon, inaako niya na an lugar iyo an saro sa pinakamayaman na pinaggugunuan niya nin mga imahen asin giromdom.

Enot siyang nag-adal sa Lupi Central School asin nagpadagos sa sekundarya sa Ateneo de Naga University kun niya man tinapos an kursong AB Development Communication. Ngunyan, si Nierva nagtutukdo sa Department of Media Studies kan AdNU. Sa presente, tinatapos niya an MA Creative Writing sa Unibersidad kan Pilipinas.

An saiyang Antisipasyon asin iba pang rawitdawit nagin sarô sa mga ganador sa Premio Tomas Arejola para sa Literaturang Bikolnon kasabay an rawitdawit man ni Jimple Borlagdan kan 2007. Bàgo kaini, saro pang katiriponan kan saiyang mga rawitdawit an nagin finalist sa PTALB kan 2006.

An libro niyang Antisipasyon: asin iba pang rawitdawit sa Bikol asin Ingles ginawadan kan 2007 National Book Award for Poetry kan Manila Critics Circle asin kan National Book Development Board. Siya an nagin pamayo kan Kabulig Bikol Writer's Association bago an reorganisasyon kaini.

• Victor Dennis T. Nierva UP National Writers Workshop 2009

• Blog niya
• Victor Dennis T. Nierva sa Vox Bikol