Vasil Orosz

Василь Орос, * 12. август 1919, Салдобош, Подкарпатска Русь – † 20. новембер 2001, Ужгород, Украина — слависта, диалектолог, фолклориста, педагог.

Школы

Василь Орос походив зоз селянской родины Ивана Ороса, де было восьмеро дѣтей. В родном селѣ закончив шѣстькласну народну школу (1925–1931), пак — гимназию в Хустѣ (1931–1939) и зачав ся учити русску и латинску филологию на Дебреценской универзитѣ. По первом року продовжив штудии на Будапештской кральовской мадярской научной универзитѣ Петера Пазманя, де учив ся славистику, латинску и грецку филологию, историю Восточной Европы, а в остатном рочнику быв уже асистентом вызнамного професора-слависты Иштвана Кньежи. 13. мая 1944 успѣшно обгаив докторскый елаборат Русинска фонетика села Салдобош и зыскав ступѣнь PhD.

Педагогична робота

Зостав на катедрѣ професора Кньежи, де ушорьовав библиотеку, приготовляв учебны тексты, але перемѣны, што настали по войнѣ, заставили го охабити будапештску карьеру. Од року 1945 спочатку учив русскый язык, латинскый язык на Хустской гимназии.

Неодовго гимназия была роздѣлена на двѣ середны школы подля совѣтской системы, и тогды быв менованый на пост директора Хустской СШ №1. По отворѣню в Хустѣ педагогичного училища, учив там русскый язык и быв продиректором екстерного школованя. В роках 1956–1960 — продиректор новоствореной Хустской интернатной школы.

Научна робота

В року 1960 через конкурз зыскав мѣсто старшого преподавателя русского языка Ужгородской державной универзиты. Ту находить ся в колективѣ зоз своима колегами, познатыма еще в добѣ, коли учив ся на Хустской гимназии — М. Симуликом и П. Линтуром. В року 1961 на Львовской универзитѣ обгаив кандидатску роботу Украинские говоры Хустского района Закарпатской области Украинской ССР в их связях с другими говорами украинского языка и працовав яко доцент катедры русского языка Ужгородской державной универзиты до пензионованя в року 1982.

В роках 1974–1975 Министерством высшой освѣты быв посланый на катедру русского языка и литературы Кошицкой универзиты П. Й. Шафарика. Ту быв вызнаменаный великов медалиев филозофской факулты и зостав честным чле­ном Языкознательского инштитута Л. Штура при Словацкой Ака­демии Наук в Братиславѣ.

Опубликовав около 70 научных робот, предметом котрых выбрав язык творбы мѣстных писательох — А. Духновича, А. Павловича, И. Силвая, Е. Фенцика, А. Годинкы, меджиязыковы контакты, штилистику и морфологию русского языка и др. Але найвекшым его интересом быв язык и култура родного края. Пять зошитох з материалами своих штудий людовой културы Южного Марамороша загнав до теперѣшного Инштитута умѣня, фолклористикы и етнологии в Киевѣ, и его тогдышный директор Максим Рыльскый написав му персонално подяковне писмо. Вельо робот опубликовав во славистичных выданях Мадярщины.

Умер и погребеный в Ужгородѣ.

• В совѣтской добѣ люде, котры зыскали дипломы на «буржоазных» высокых школах, были на подозрѣню; штуденты Василя Ороса зазначали его «необычайный» русскый язык и манѣру уберати ся.
• Василь Орос быв одосланый на пензию в повности тѣлесных и творчых сил: половку своих научных робот опубликовав уже яко пензиста.
• Правдоподобно, же причинов его наглого пензионованя было то, же двох своих дѣвок оддав до Мадярщины.

• Михайло Капраль: Любив мову і культуру рідного краю (до 90-річчя з дня народження В. І. Ороса) //Науковий вісник Ужгородського університету. Серія ФІЛОЛОГІЯ. Випуск 21. Видавництво УжНУ «Говерла», 2009. Сс. 163–164. укр.
• ОРОС ВАСИЛЬ ІВАНОВИЧ (по украинскы). Стеблівська сільська рада. http://steblivka.rada.org.ua/pismenniki-nashogo-sela-11-54-52-28-12-2016/.