Vasil Molnar

Василь Иванович Молнар, *12. фебруар 1922, Голубине, Свалявскый округ, Чехословакия – †7. май 2017, Голубине, Свалявскый район, Украина — русинскый педагог и прозаик. Брат Михайла Молнара.

Походжѣня

Походив з родины земледѣлцьох Ивана Молнара и Марии Улѣганець, што выховали восьмеро дѣти (четверо хлопцьох и четверо дѣвок), меджи котрыма быв третим дѣтваком.

Штудии

Закончив Мукачовску реалну гимназию (з русскым языком выукы), пак учив ся в Унгварской богословской семинарии, но лем три рокы, бо в року 1944 обстояня в краю ся гет перемѣнили. По отворѣню в Ужгородѣ универзиты достав высше филологичне образованя в фаху русской филологии.

Педагогом

В совѣтской добѣ оддавав ся педагогичной роботѣ. Быв первым, котрый зачав в Голубинской школѣ выучовати англицкый язык, што пак ся дале росширило на иншы школы. Вельо рокы быв ведучым районного методичного стоваришѣня преподавательох англицкого. Знав ай нѣмецкый, латинскый, мадярскый, чешскый. Удавало му ся передати интерес до штудий чужых языкох своим ученикам, а Свалявской гимназии преподавав ай латину. Вызнаменаный знаком «Відмінник народної освіти України».

Зачаткы

В литера­туру прийшов при мадяр­ской володѣ, коли ся учив на Мукачовской русс­кой гим­на­зии. Печатав ся у новинках Русская правда, Русское слово, Карпаторусскій голос, штудентскых ал­ма­на­хах, по­вѣ­даня Герой опубликовала нѣмецка будапештска новинка Volksblatt, но такой вшытко з той ранной твор­чо­сти знищив сам року 1945 из страху пе­ред пре­слѣдо­ва­ня­ми.

В найновшой добѣ

В рокы хрущовского помягку помалы ся зачав вертати ку писаню. а по веце як сорокрочной павзѣ наповно вернув ся ку лите­ра­турѣ. Звекша в новинках Вісті Свалявщини, Трембіта, Новини Закарпаття, опубликовав понад 800 повѣдань, нарисох, памфлетох, штудий, новел, етнографичных зарисох. Во своих публикациях выступав переважно в оборонѣ русинского слова, карпатской природы, реаговав на актуалны темы сполоченского живота. Нераз ся вертать ку темам воспитаня, педагогикы, и ту в его языкови, у щиром словѣ, в глубинной добротѣ указуе ся любов до родного краю и народу.

Окремы публикации

• Поклик отчого краю (Свалява, 1997)
• Бризки з Лужанки (Свалява, 1999)
• Вичурки у вуйны Полані (Свалява, 2002, сполуавтор М. Молнар)
• Цукрикы з материнськов наповнянков (Ужгород, 2009)
• Запискы старого вандролюба (Ужгород, 2010)
• Потятка гнїзда Голубиного (Ужгород, 2011)

На интернету

Василь Молнар. Укажкы з творбы. https://rusin8.webnode.ru/tags/%D0%92%D0%B0%D1%81%D0%B8%D0%BB%D1%8C%20%D0%9C%D0%BE%D0%BB%D0%BD%D0%B0%D1%80/. [перевірено 2022-02-10]. 

• Алмашій, Михайло. Молнар Василь Іванович. //Русинська педагогічна енциклопедія. Ужгород: Карпатська Вежа, 2005. C. 160. ISBN 966-2674-43-X. укр.
• Йосиф Долинич. Серцем і розумом з отчим краєм. //Вісті Свалявщини. Свалява, 2007 10 лютого. С. 3. 
• Игорь Керча (2012). 2012 Василю Молнару – 90!. https://rusin8.webnode.ru/news/a2012-vasilju-molnaru-90-/. [перевірено 2022-02-10]. 
• Микола Рішко. Житя, одданоє людьом (Васильoви Молнарови 95). //Отцюзнина, 1(3), 2017. Закарпатське научно-културологичне общество им. А. Духновича. сс. 22–23. https://www.rueportal.eu/knyhovnyca/otcuznyna-3/. 
• Визначні діячі Свалявщини