Thos Liebenberg

Ds. Thomas Arnoldus Liebenberg (noemnaam Thos, 7 Julie 1932, Bloemfontein – 5 Februarie 2008) was tussen 1960 en sy emeritaat in 1997 predikant in drie gemeentes van die Gereformeerde Kerke in Suid-Afrika, waarvan die laaste 26 jaar in Witbank.

Thos Liebenberg is in die Vrystaatse hoofstad as die derde seun en derde kind uit ’n gesin van agt kinders – vyf seuns en drie dogters – gebore. Hy het gematrikuleer aan die Hoërskool Sentraal en daarna in die staatsdiens begin werk. In dié tyd het hy sy B.A. buitemuurs deur Kovsies verwerf en ook ’n honneursgraad in filosofie aan die destydse PU vir CHO. Daarna het hy sy Th.B. in 1959 voltooi.

In 1958 het hy Magda Grabhorn ontmoet. Sy het tydens haar skoolopleiding aan die Hoërskool Gimnasium by haar ouma-hulle ingewoon. Ds. Liebenberg het as student sy etes by Magda Grabhorn se ouma geneem, en so het hulle mekaar ontmoet. Sy sou later vertel sy het dadelik op die teologiestudent se pyp verlief geraak, en daarna op hom. Ná skool het sy onderwys aan die Potchefstroomse Onderwyskollege studeer.

Die egpaar is op 1 April 1961 op Bothaville getroud. Drie dogters is uit die huwelik gebore: Marika, Jo en Madie. Begin 1961 is ds. Liebenberg in sy eerste gemeente, Ladybrand bevestig. Van 10 Januarie 1966 tot 1971 het hy in die Gereformeerde kerk Virginia gedien. In dié tyd het hy vyf beroepe gekry waarvan hy die vyfde, na Witbank, aanvaar het. Daar is hy op 10 Januarie 1972 bevestig. Tydens sy lang bediening in Witbank het hy twee beroepe ontvang, maar hy was daarvan oortuig dat hy geroep was om op Witbank te bly.

Op sy 44ste verjaardag, 7 Julie 1976, was daar ’n brand in die kerk wat groot skade veroorsaak het, maar met die pastoriepaar se ywer, geloof en durf is die kerk herstel en ook daarna, in 1981, ’n saal in gebruik.

In 1976 het ds. Liebenberg ’n hartaanval gekry waarvan hy goed herstel het. In 1995 is hul oudste dogter, Marika, oorlede, en in dieselfde jaar moes Magda Liebenberg ophou skoolhou omdat sy begin doof word, het. In Mei 1998 het sy ’n kogleêre inplanting gekry wat haar gehoor herstel het.

Ds. P.J. Nel skryf in ds. Liebenberg se lewenskets in die Almanak vir die jaar 2009 ds. Liebenberg as baie lief vir hout- en sweiswerk. Hy was baie goed met sy hande en ook lief vir gholf speel. Buite gemeenteverband het hy baie in die onderwys belanggestel en was hy tydens sy bedieningsjare voorsitter van die deputate Christelike onderwys van die Nasionale Sinode.

"Oom Thos het geen fiemies gehad nie," skryf ds. Nel. "Sy familie het van Koffiefontein se omgewing gekom en daarom was hy baie lief vir skaapvleis van daardie omgewing. Hy was ’n goeie pa vir sy kinders. Al drie dogter het elkeen net een keer hul lewe ’n pak slae gekry by oom Thos, en tannie Magda moes maat die roede in die huis hanteer.

"Sy katkisante het nogal gesidder vir oom Thos se klasse, maar met die ondervragings was hy altyd partydig vir die katkisante, om tannie Magda se woorde te gebruik," skryf ds. Nel. En op ’n persoonlike noot: "Sy sagtheid en dripte en onwrikbare geloof sal ek altyd onthou, en kosbaar was sy sin vir humor, selfs tot in sy laaste dae hier op aarde."

• (af) Nel, ds. P.J. in Vogel, ds. Willem (et al). 2008. Die Almanak van die Gereformeerde Kerke in Suid-Afrika vir die jaar 2009. Potchefstroom: Administratiewe Buro.