Santiago Ricalde

Felipe Santiago „San“ Ricalde (* 1. Mai 1920 in Corozal; † 23. September 1975) weer en Politiker ut Brietsch-Honduras/Belize (PUP).

Leven

Ricalde is 1920 as veert Kind von Eustaquia, borene Moguel, un Antonio Ricalde in Corozal boren. He weer dor op de St. Francis Xavier School un denn op de Johnny Vernon Private School in Belize-Stadt. Nadem sien Vader doodbleven is, müss he de School afbreken. He hett as Chiclero un Farmer arbeidt un weer Wannerarbeider an’n Panamakanaal.

Ricalde hett in en Öller von 20 Marciana Flores freet. De beiden harrn dree Söhns un dree Döchter.

Nadem he ut Panama trügg weer, hett he anfungen in de Zuckerfabrik von Pembroke Hall (Corozal Sugar Factory) to arbeiden.

Ricalde is an’n 23. September 1975 na en Hartanfall doodbleven.

Politik

In Pembroke Hall hett Ricalde to de Gewerkschaftsarbeid funnen un weer in de General Workers’s Union (GWU) aktiv. Över de GWU keem he ok to de People’s United Party (PUP).

He weer von 1955 bet 1966 Börgermeester von Corozal. He harr in düsse Tied ünner annern de Opgaav, de Stadt 1955 na Hurrikan Janet un 1961 na Hurrikan Hattie wedder optoboon. En Mandaat in’n Stadtraad von Corozal harr he bet 1973.

Bi de Parlamentswahl in Brietsch-Honduras 1957 weer he Kannedaat för de PUP in’n Wahlkreis Corozal un hett de Wahl mit 82,3 % von de Stimmen gegen Jose Leon Chin von de HIP wunnen.

Bi de Wahl 1961 weer he Kannedaat in’n Wahlkreis Corozal Noord un hett sik dor mit 79,9 % von de Stimmen gegen Gualberto Martinez von de NIP dörsett. Ok bi de Wahlen 1965 (70,4 % gegen Gualberto Martinez Jr., NIP) un 1969 (60,6 % gegen Martinez) hett he wedder wunnen.

In’n November 1973 is Ricalde ut de PUP rut. Ricalde hett meent, dat de PUP nich de Intressen von de Lüüd in’n Distrikt Corozal vertreden dee. Dat hett dorto föhrt, dat sik in’n Distrikt Corozal de Corozal United Front (CUF) grünnt hett. Bi de Wahl 1974 is Ricalde aver nich för de CUF antreden. As unafhängigen Kannedaat hett he 7,4 % von de Stimmen haalt. He keem op’n drüdden Platz achter Vilio Marin von de PUP un Edwardo Tillett von de CUF.

Dormit weer he von 1957 bet 1963 Afornten von de Legislativversammlung, ut de to’n 1. Januar 1964 dat Repräsentantenhuus worrn is. He is denn bet 1974 Maat von dat Repräsentantenhuus bleven.

Ehren

En Büst von Ricalde is 1990 in’n Corozal Central Park in Corozal opstellt worrn.

Ricalde weer 1991 op en 1-Dollar-Breevmark afbillt, de in en Reeg to de 10-Johr-Fier von de Unafhängigkeit von Belize rutgeven worrn is.

Footnoten

1. ↑ Heroes and Benefactors, Amandala