Robert W. Hoge

Robert Wilson Hoge, nado en Wilmington, Delaware, o 1 de maio de 1947, é un numismático, conservador e director de museo estadounidense.

Primeiros anos e formación

Nado en Delaware, a familia de Robert W. Hoge trasladouse a Colorado cando o seu pai causou baixa no exército dos Estados Unidos. Na súa infancia comezou a amosar interese pola historia, a arqueoloxía e o coleccionismo, inicialmente de obxectos militares e despois tamén de moedas.

Hoge cursou os seus estudos superiores de Antropoloxía, Historia, Xeografía e Educación na Universidade de Colorado, onde se graduou en 1969. Posteriormente realizou estudos de posgrao nesa mesma institución académica e na Universidade de Chicago.

Carreira profesional

A súa actividade profesional transcorreu en diversos postos como profesor universitario, director de museo e conservador. Entre 1976 e 1981 asumiu a dirección do Sanford Museum and Planetarium en Cherokee, Iowa.

No ámbito numismático foi conservador no museo da American Numismatic Association (ANA), en Colorado Springs, entre agosto de 1981 e agosto de 2001. Ese último ano trasladouse a Nova York para desempeñar o mesmo posto na American Numismatic Society (ANS) ata a súa xubilación en abril de 2013.

Hoge foi presidente do Buena Vista Coin Club, de Storm Lake, Iowa, entre 1980 e 1981. Así mesmo, foi xuíz principal da American Numismatic Association en 1982.

Hoge foi colaborador habitual na sección "Curator's Comer" da revista The Numismatist a partir de 1983. Tamén escribiu varios capítulos de libros e numerosos artigos na ANS Magazine, sinaladamente na súa sección "Current Cabinet Activities".

Robert W. Hoge é membro da Rittenhouse Society.

En 2012 foi nomeado pola US Mint membro do Comité Consultivo Cidadán sobre a Moeda dos Estados Unidos.

En decembro de 2012 Hoge casou coa historiadora Inmaculada Socias i Batet, profesora da Universidade de Barcelona.

• (2012): Premio Burnett Anderson Memorial, da ANA, a ANS e o Numismatic Literary Guild (NLG).

Bibliografía

• Orzano, M. (2013). "Hoge retirement from American Numismatic Society". En Coin World. 30 de outubro.
• Smith, P. (2012). "Hoge, Robert W(ilson)". En American Numismatic Biographies. Páxina 208.

Ligazóns externas

• Vídeo: conferencia de Hoge sobre coleccionismo numismático (en castelán).
• Vídeo: conferencia de Hoge sobre a colección numismática de A. M. Huntington (en castelán).