Quick Facts
TaurusBiography
Matías López López, nado en Santa Mariña de Sarria, o 17 de maio de 1825 e finado en Madrid o 18 de xuño de 1891, foi un político e industrial galego, benefactor do concello de Sarria.
Traxectoria
Industrial chocolateiro en Madrid, político e filántropo sarriao, foi o membro máis destacado da familia dos "Moreno" de longo asentamento na vila de Sarria. Matías López López, fillo e neto de labregos pobres, naceu na casa paterna que na fronteira á rúa ten unha lápida que di: "El Ayuntamiento de Sarria al Excmo. Sr. D. Matías López López. Benefactor e insigne hijo de esta villa. Nació en esta casa el 17 de mayo de 1825". É unha das máis humildes e reducidas casas da Sarria histórica, e no catastro de Ensenada (1753) aparece sendo titular dela unha María López. Emigrado a Madrid en 1840, montou unha factoría para a elaboración de chocolate e produtos de pastelería. Alcanzou o máis grande suceso económico e postos de relevancia na política e no mundo empresarial, sendo destacado promotor do asociacionismo derredor da Cámara de Comercio madrileña.
Foi deputado polo distrito de Sarria (1872-1873 e 1876-1879), senador pola provincia de Lugo (1877) e designado senador vitalicio en 1883.
Formou familia en Madrid, casou con Andrea Andrés Sánchez, e alí, e en El Escorial, naceron e morreron os seus fillos, sobrevivindo só as fillas Rosa, Carme e Asunción, das que quedou unha numerosa descendencia.
Após a súa morte, a súa viúva, Andrea Andrés Sánchez, obtivo da Santa Sede o título de Marquesa de Casa López. En cumprimento de disposición testamentaria de Matías López, con cargo á súa testamentaría edificouse o edificio das Escolas Públicas de Sarria, segundo proxecto redactado por Luís Bellido. O construtor foi José Rivas Novoa, veciño de Lugo. As escolas, dotadas con moderno material, foron a mellor proba do cariño que con Sarria tivo sempre Matías López, quen se desprazaba a Sarria con moita frecuencia, malia a dificultade das comunicacións con Madrid, tendo todo xénero de deferencias para coa súa terra natal.
En 1878 o concello, dado que o reloxo de Santa Mariña estaba inservible, prégalle a Matías López que adquira un en Madrid. En 1885 Matías López, Senador do Reino, dá 500 pta. e ofrece máis se fixeran falla, para algunhas medidas excepcionais por mor da epidemia de cólera. No ano 1886 o concello acordou obsequiar a Matías López cunha serenata, no mes de agosto, por xoves afeizoados. En 1888 acordan darlle o nome de RÚA MATÍAS LÓPEZ ó treito comprendido entre as casas de Juan Puga e a de Bernardo Rodríguez Romay, "xa que mirou ó pobo sempre con cariño e predilección, interesándose pola súa grandeza e distinguíndoo con algún donativo". Matías López paga os letreiros das rúas e acordan darlle unha serenata. En 1890 dirixiu carta sobre supresión de Xulgados. Diríxense a este e ó Conde Pallares, Manuel Becerra, Benigno Quiroga L. Ballesteros... para que xestionen non se suprima o de Sarria.
Recibiu a Gran Cruz de Isabel la Católica, a Encomienda de Isabel la Católica e a Legion d’Honneur.