Markus Dieth

De Markus Dieth (* 16. Mai 1967 z Davos, u.a. heimatberechtiged z Wettige) isch en Schwizer Politiker vo de CVP.

De Markus Dieth het s Gymnasium z Davos bsuecht und mit de Matura Typ B abgschlosse. Er het dann an de Uni z Züri Jus gstudiert und promoviert. Vo 1988 bis 1992 het er bi de Flughafepolizei Züri gschafft, vo 1994 bis 1999 isch er Grichtsschrieber z Zurzach gsi und het gliichzitig z Bade in ere Anwaltskanzlei gschafft. Sit em 1996 het de Markus Dieth s Anwaltspatent vom Kanton Aargau. Ab em 1999 het er bis zu sim Amtsatritt als Gmeindsamma als Rechtsawalt z Bade gschafft.

De Markus Dieth isch vo 1998 bis 2001 Präsident vo de Wettiger CVP gsi und von 2001 bis 2005 Iiwohnerrat. Im 2006 isch er in de Gmeindrat vo Wettige gwählt worde, wo er sit em Rücktritt vom Karl Frey im 2008 Gmeinsamma isch. Zudem isch er sit em März 2009 Mitglied vom aargauische Grossen Rat, won er im 2015 als Präsident vorgschtande isch. Im April 2016 isch er vo de CVP Aargau als Kandidat für d Wahle i de Regiirigsrot im Herbscht 2016 nominiirt worde, wo er Nochfolger vom CVP-Regiirigsrot Roland Brogli sell werde. Glichwohl stoht er au uf em zweite Lischteplatz vo de CVP im Bezirk Bade für d Grossrotswahle am 23. Oktober 2016.

De Markus Dieth isch ghürate und het zwei Chind. Er läbt z Wettige.

• D Website vom Markus Dieth
• Markus Dieth uf de Website vo de Gmeind Wettige
• De Markus Dieth uf de Website vom Grosse Rat vom Kanton Aargau