Quick Facts
Biography
Lancino Curti, anca della Corte o Curzio (1460~ - Milan 2 Febrar 1512), l'è stai un leterad e scritur lumbard d'épuca rinascimental, famus par d'i sunet scrit en milanes.
Biugrafìa
Par che'l sia nassüd dinturnu al 1460, ind el ménter d'la duminassion sfursesca. L'ha stüdiàd a Pavìa cun el maèstor Giorgio Merula.
Ind el 1481 l'è indicad cume un contrascriptor cun un stipendi de ses fiurin al mes. Prubabilment l'era un emanüéns de cuncet che'l se ucupeva de fà la tradüssión d'i test clàssich suta el cuntrol dal stess Merula. Ind el 1488 l'era un insegnant de Pavìa, ma anca un letur de metafìsica. Quel che l'ha lassad i en tri lìbor de puesìe en latin e 'na ventina de sunet in dialet milanes.
El Lancino Curti l'ha partecipad a la vita de la cità de Milan cun incàrich de miga poca impurtansa, anca suta i frances, dopu la tempuranea scaciada de gli Sforza dal 1499. Ind d'i sò epigrama el cunsilieva ai frances de murtificà miga la pupulassion ma de truà un acordi cun lur.
Ind el 1503 l'era ind la cumission par la scelta d'le porte dal Dom, ménter ind el 1505 l'è stai el rapresentant milanes par l'urassion a Lüìss XII.
Ind i sò sunet, el Lancino Curti el cercheva da es püssè visin pussìbil a la sò realtà. Al ghe piaseva miga el mudel de Petrarca. Ind a ch'la pusission chi el và un sunet scrivüd cuntra al Baldassar Tacon, pueta che l'era urietad ind una diression muralment poch impegnada.
I sunet de Lancino Curti i en la dimustrassion che, bele ind al 1500, gh'era una literadüra en lengua lumbarda de pensé critich e muralisadù.