Quick Facts
Biography
Kurt Palis (* 16. Oktober 1937 in Engelshöhe, Landkreis Wehlau) is en düütschen Politiker von de SPD.
Palis is 1937 in Engelshöhe boren. Na de Volksschool weer he op dat Gymnasium un hett 1957 an de Loonborgsche Gelehrtenschool dat Abitur maakt. He hett denn an de Universität Hamborg Pädagogik un Rechtswetenschoppen studeert. Von 1969 bet 1977 weer he Scholungsreferent bi en Privatversekerung un weer för dat fachliche Training von Butendeenstmitarbeiders tostännig. Von 1977 bet 1980 hett he sülvs in’n Versekerungsbutendeenst arbeidt. Bet 1993 hett he wedder as Referent in Versekerungsünnernehmens arbeidt.
Politik
Palis is Maat von de Gewerkschaft HBV un weer Bedrievsraadsvörsitter in sien Ünnernehmen. 1965 is Palis in de SPD rin. En Tied weer he ok Vörsitter von’n Distriktvörstand in Hamborg-Jenfeld un von’n SPD-Oortsvereensvörstand Soltau. Von 1991 bet 1993 weer he Raadsherr von’n Stadtraad Soltau. Von 1991 af an weer he Kreisdagsafornten von’n Landkreis Soltau-Fambossel. As he an’n 12. Juli 1993 in’n Bundsdag intagen is, hett he siene Ämter in’n Stadtraad un Kreisdag afgeven un ok siene Arbeid bi de Versekerung rohn laten. In’n Bundsdag is he rinkamen, nadem de Afornte Günther Tietjen doodbleven is. Bi de Bundsdagswahl 1994 is he över de Landslist wedderwählt worrn. Bi de Bundsdagswahl 1998 is he mit 47,0 % von de Eerststimmen as direkt wählten Afornten för den Wahlkreis Rodenborg I-Soltau-Fambossel wählt worrn. Mit dat Enn von de 14. Wahlperiood is he 2002 ut’n Bundsdag utscheden.
Palis is verheiraadt un hett twee Döchter.