Julius Bulahan

Si Julius Denido Bulahan gikan sa Syudad nin Naga sarong Bikolanong parasurat nin rawitdawit, pintor asin nagin presidente kan Parasurat Bikolnon. Dating opisyal na pampublikong tagapagtaram (PIO) kan 2018, sekretaryo kan 2019, asin sekretaryo kan board kan organisasyon. Sa presente, siya an saro sa mga tagapagmukna asin opisyal na pampublikong tagapagtaram (PIO) kan Pagsirang, Inc.

Nagin partisipante siya kan Saringsing Writers Workshop kan 2015 asin nagin tagapadalagan kaini kan 2017. Bago kaini, siya nagin partisipante kan Juliana Arejola-Fajardo Workshop sa Pagsurat-Bikol na ginibo sa Syudad nin Naga kan 2012. An saiyang rawitdawit na Dai ka man Baduan nin Bagong Panganuron, Daragang Magayon sarò sa mga napiling rawitdawit sa ginibong Kabulig Inaugural Writers Prize 2018 asin nakabali sa sampulong shortlisted sa Kabulig Writers Prize - Usipong Pan-aki an saiyang panurat na An Kwarto ni Kara kan 2019. Bago kaini, an saiyang rawitdawit na An Pantsong nin Kahaputan nanggana nin ikaduwang premyo sa Gawad Obrang Literaturang Bikolnon para sa bulan nin Hunyo 2012.

Naipublikar an mga rawitdawit ni Bulahan sa Cha: Asian Literary Journal base sa Hongkong, Ani 39: Kahayupan/The Animal Kingdom (2016) na pinagpupublikar kan Sentro Pangkultura kan Filipinas (CCP), Girok: erotika (2017) kan New Yorks V.C IGARTA, Kabulig Bikol, asin Bangraw kan Arte, Literatura asin Kultura, sarong literaryong babasahon kan National Commission for Culture and the Arts (NCCA). Ipinagpublikar man niya nin surusadiri an Makot nin mga Rawitdawit, sarong libro nin mga rawitdawit sa Tataramon na Bikol Sentral sa Better Living Through Xeroxography Naga kan 2017.

Bilang sarong pintor, siya nagin sekretaryo kan Kintab Artists Group, sarong non-profit na grupo nin mga visual artists, parasurat, asin musikero na an intension iyo an igantad an kultura, tradisyon, arte, asin literatura kan Bikol. Sa ginibong Kurit Aki Art Exhibit poon Enero 20 sagkod 27, 2019 sa SM City Naga, nahiling an saiyang mga obra sa sarong eksibit para sa sarong kawsa na hinimò kan Mariner's Polytechnic Colleges Foundation, Tabang Bikol Movement asin Kintab Artists Group. Pinartisiparan ini nin kaakian na nagtapos sa sarong worksyap nin Kurit Aki asin mga Bikolanong parakurit. Apwera kaini naibali naman an saiyang mga obra sa manlain-lain na exhibit sa laog asin luwas kan Kabikolan.