Johann Georg Wolff

Johann Georg Wolff (* 17. Januar 1641 in Lümborg; † 1695) weer en düütschen Verwaltungsbeamten.

Wolff is 1641 as Söhn von Margareta, borene Oelrich (18. November 1608–25. März 1655), un den Amtmann Christian Wolff in Lümborg boren. He hett von Harvst 1659 af an an de Universität Leipzig Juristeree studeert un 1665 denn an de Universität Straßburg sien Dr. jur. maakt. In de Tied von’n Bremen-Veerner Feldtog 1675/1676 hett he sik gegen de Sweden stellt un müss dat Land verlaten. As aver mönstersche Truppen Land Wusten innahmen harrn, keem he trügg. He hett in disse Tied veel Land köfft, wat de Wusters verköpen müssen, üm de Kriegslasten to betahlen. So keem en Besitt von 340 Jück Land (üm un bi 204 Hektar) tohoop. He is von Mönster as Landrichter un as Böverdiekgreev von Leh, Land Wusten un Noordholt-Dieksenn insett worrn. Nadem de mönsterschen Truppen 1680 wedder aftagen sünd, is Wolff as Landrichter un Amtmann in dat Amt Neehuus versett worrn.

1686 keem he na Wusten trügg. He weer denn bet to sien Dood 1695 Bövervaagd von dat Vaagdiegericht Land Wusten un hett ok dat Amt as Böverdiekgreev wedderkregen. An’n 9. Januar 1692 is he as Wolff von der Wolffsburg adelt worrn.

He hett an’n 4. Juni 1668 Elisabeth Eibsen (borene von Eckerich; † 1718) freet, Dochter von’n Generaal Eggerich Johan Lübbes. So hett Wolff Lübbes sien Besitt in Land Wusten arvt. Wolff un siene Fro harrn de Kinner Kurt Christoffer († 6. August 1716), Johan Georg (1672–8. Februar 1720) un Catharina Elisabet (12. März 1677–14. April 1710; hett Conrad Christoffer Johan von Wahlburg freet). Mit den Dood von Johann Georg 1720 is de Familie Wolff von der Wolffsburg wedder utstorven.

1. ↑ Von der Wolffesburg in dat Adelsvapen-Wiki
2. ↑ Der bestgehasste Mann des Landes. Kriegsgewinnler und Machtmensch: Wolff von der Wolffsburg, Küstenjournal an’n 17. Juli 2011
3. ↑ Beate-Christine Fiedler: Die Verwaltung der Herzogtümer Bremen und Verden in der Schwedenzeit 1652-1712. Stoder Geschichts- un Heimatvereen, Stood 1987, Sied 152