Jerónimo Borao y Clemente

Gerónimo Borao y Clemente (Zaragoza, 1821 - 23 de noviembre de 1878) estió un escritor, profesor universitario y politico aragonés d'o sieglo XIX, catedratico de luenga espanyola en a Universidat de Zaragoza, d'a qual estió tamién rector tres vegadas. A tradición castellana ha escrito lo suyo nombre como «Jerónimo», pero ell lo escribiba con G-.

Se considera una figura mayor en o Romanticismo aragonés, se manifestó siempre a favor d'o progresismo liberal y prenió parte por a Revolución de chulio de 1854, que esclató en Zaragoza y remató por instaurar lo Bienio Progresista d'Espartero en Madrit, pasando bells meses en prisión a partir d'o desistimiento d'o gubierno aquell en 1856. Estió vicepresident d'a Exposición Aragonesa de 1868, miembro de l'Academia de San Luis, y academico d'a Real Academia Española d'a Luenga y a d'Historia.

Gerónimo Borao naixó en Zaragoza en 1821. Estudeó en os Escolapios dica ingresar en a Universidat de Zaragoza, en do se licenciaría en Dreito en 1843. Obtenió la catedra de Literatura Cheneral y Espanyola en 1847, quan no teneba que 26 anyos.

Seguntes a suya propia cronica (Historia del alzamiento de Zaragoza en 1854), fizo parte activa en o levantamiento popular contra o Gubierno establiu en 1854, que tenió lo primer epicentro en Zaragoza en do se trobaba en ixas envueltas o cheneral Espartero. Borao s'autodefine como «infatigable campeón de las ideas liberales». Quan a revolución triumfó, a reina Isabel gritó a Borao como diputau a Cortz Constituyents, puesto que ocuparía mientres o Bienio Progresista. En 1855 fue nombrau rector d'a Universidat de Zaragoza. Pasó bells meses engarcholau en Valencia en represalia por os suyos posicionamientos politicos, con a tornada ta poder d'os conservadors d'O'Donnell en 1856, dimpués de rematau o periodo progresista. A partir de que le liberan, torna a amostrar en Zaragoza, pasando uns anyos discretos dica la fin d'ixa decada.

En 1840 colabora en a fundación d'o Liceo Literario y Artístico de Zaragoza, y comienza a cooperar en a edición d'a suya revista «La Aurora». Quan ixa publicación plegó, principiaría a colaborar con «El Suspiro». A la fin d'os suyos días, colaboraba de regular con a Revista de Aragón.

En 1859 publica o «Diccionario de voces aragonesas» que se conoix popularment con o suyo nombre. Ye una recopilación de 2959 parolas y lexico comuns de l'aragonés y o castellano d'Aragón d'ixes tiempos, precedius d'una introducción de más de 100 pachinas en a qual manifiesta un claro sentimiento aragonesista y reflexiona fundament sobre a posición filolochica d'Aragón entre as luengas d'Espanya y a necesidat de guardar as parolas d'un idioma que siente perder-se a trote.

En 1868 os progresistas tornan a puyar ta poder, y Borao torna a estar nombrau rector d'a Universidat de Zaragoza. Aprofita pa publicar a suya Historia de la Universidad de Zaragoza, animau por a publicación homologa d'a de Valencia l'anyo anterior. En 1876 tornaría a estar-ne, por tercera vegada.

Muere en Zaragoza o 23 de noviembre de 1878 entre que aprestaba o suyo «Diccionario de voces aragonesas» pa la segunda edición, con 57 anyos d'edat.

Autor de bellas poesías, no teneba tanto talento pa la lirica como pa la narrativa. O que sí fizo estió escribir versos que recopilaban as poesías publicadas por o impresor zaragozano D. Calixto Ariño. Destacó más que más por a suya narrativa, que estaría d'as más destacables d'o drama romantico aragonés, en chunto con a de Huici.

Poesía

• Dance de Nuestra Señora de Magallón de Leciñena (1837).
• Lanuza (1840).
• Zaragoza en su 5 de marzo (1842).
• A Azara (1850).

Drama

• Las hijas del Cid (1842).
• Los condes de Portugal (1862).
• Los privilegios de la Unión (1862).
• Alfonso el Batallador (1868).

Novela

• Don Clarisel de las Flores (1866).

Lexicografía

• Diccionario de voces aragonesas, precedido de una introducción filológico-histórica (1859).

Monografías

• Noticias de Don Jerónimo Ximénez de Urrea (1850).
• Tratado de Ajedrez.
• Tratado de Aritmética.
• La imprenta en Zaragoza (1860).
• Historia de la Universidad de Zaragoza (1869).

• Mariano Peralta.
• José María Huici.
• José Pardo Asso.
• Juan Moneva y Puyol.