Jan Mahr

Jan Mahr (němsce Johann Mahr; * 16. februara 1765 w Njebjelčicach, † 9. nowembra 1848 w Lubanju) bě serbski katolski farar, doktor teologije a dobroćel katolskich Serbow.

Narodźi so jako syn Njebjelčanskeho ratarja a wopytowaše gymnazij w Budyšinje. Wot 1777 do 1781 bě chowanc Praskeho Serbskeho seminara a šuler tamnišeho němskeho Małostronskeho gymnazija. Po gymnaziju studowaše hač do lěta 1788 teologiju w Romje, hdźež złoži doktorat a sta so z měšnikom. Po nawróćenju dźěłaše jako domjacy wučer w Bernstadće a kapłan w Haagu. W lěće 1796 nastupi farske městno při Budyskej tachantskej cyrkwi, hdźež hač do lěta 1819 skutkowaše. Wot 1819 hač do swojeje smjerće 1848 bě klóšterski probst a měšćanski farar w Lubanju a zdobom cyrkwinski a šulski wizitator katolskich wosadow Kulow, Jauernick, Hennersdorf a Pfaffendorf we Wrócławskim biskopstwje.

Za spěchowanje katolskich serbskich studentow, šulerjow a wučomnikow sakskeje Hornjeje Łužicy wotkaza wjetšu załožbu.

• Jan Meškank: Mahr, Jan. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 358sl.