Quick Facts
Biography
Jan Hempel (němsce Johannes Hempel; * 20. februara 1917 w Budyšinje, † 19. junija 1998 w Drježdźanach) bě serbski režiser. Wón płaći jako „pioněr NDR-skeho klankoweho filma“.
Hempel narodźi so w Budyšinje jako syn mějićela zahrodnistwa. Po dokónčenju šule činješe najprjedy wukubłanje jako dekoraciski moler a studowaše potom na Drježdźanskej akademiji za tworjace wuměłstwo. Pozdźišo dźěłaše hač do wójny jako wuhotowar jewišćow.
Po wójnje bě Hempel zhromadnje z Alfredom Krawcom, Konradom Herrmannom a Tonijom Brukom jedyn ze załožerskich čłonow Koła serbskich tworjacych wuměłcow.
W lětomaj 1950/1951 produkowaše zhromadnje z Měrćinom Nowakom-Njechorńskim a Kurtom Hajnu priwatnje prěni klankowy trikowy film NDR – bajku „Bity njebiteho njese“, ze serbskimi podtitulemi. Wot lěta 1955 natwarješe wón w Drježdźanach tamniše studijo trikowych filmow a bu pozdźišo jeho nawjednik.
Politiskich přičin dla, njemóžeše wón wot lěta 1962 dale pola DEFA dźěłać a skutkowaše wot toho časa jako priwatny filmowy producent.
Dohromady zhotowi Hempel wjace hač 60 filmow.
Žórle
- Ratajczakowa, Cordula: „Wo Serbje Janu Hempelu, kiž je so do filmowych stawiznow zapisał“ W: Předźenak, 13. nowembra 2015, str. 2.
- Bruk, Toni: „Der Film bei den Lausitzer Sorben“. Projekt Rastko Lusatia