Quick Facts
Biography
Georg Hermann Quensell (* 22. August 1815 in Lautenthal; † 14. Februar 1877) weer en düütschen Verwaltungsbeamten.
Quensell is 1814 as Söhn von Marie Charlotte, borene Schmidt (1. Juni 1787-19. November 1846), un den Forstmeester Heinrich Georg Siegmund Quensell (15. Oktober 1778-30. Juni 1850) in Lautenthal boren. Na dat Studium von de Juristeree hett he sien Loopbahn in’n hannöverschen Staatsdeenst in Lindau anfungen. Von dor is he 1844 na dat Amt Erichsborg wesselt un 1849 as drüdden Beamten in dat Amt Lamspringe. Na de Tied in Lamspringe hett he bi de Landdrostie Lümborg arbeidt. 1852 weer he Amtmann in dat Amt Lesum. Von dor güng he 1855 as Nafolger von Ferdinand Wippern as Amtmann na dat Amt Dorum. Nadem 1867 Prüßen dat Königriek Hannover annekteert hett, hett Quensell sien Amt denn Amtshauptmann heten. Dat is he bet 1873 bleven. Na em is Alexander Sostmann Amtshauptmann von dat Amt Dorum ween.
1873 is Quensell denn Kreishauptmann von’n Kreis Aimbeck worrn. Dat is he bet to sien Dood 1877 bleven. Quensell is an’n 14. Februar 1877 na en Slaganfall doodbleven.
He hett an’n 24. April 1853 Marie Charlotte Franziska Lüntzel (5. August 1827-24. Mai 1929) freet. De beiden hebbt de fiev Kinner Franz Hermann Georg (* 9. Januar 1855), Harro (* 24. Juni 1856), Ernestine (* 15. März 1858), Hermann (* 23. Oktober 1861) un Frieda († 3. Dezember 1889) hatt.