Heinrich Meyer

Heinrich Meyer (* 19. November 1878 in Bülkau; † 7. Juni 1948 in Cuxhoben) weer en düütschen Politiker.

Meyer is as Söhn von en Buur in Bülkau boren. Na de Volksschool weer he in de Bueree anstellt. Later hett he denn den Hoff von sien Vader in Bülkau övernahmen.

Na’n Eersten Weltkrieg is Meyer in de Politik aktiv worrn. He is bi 1920 Maat von de Wirtschaftliche Vereinigung (WV) worrn, för de he von 1921 bet 1924 in’n Landdag von Prüßen weer. Bi de Rieksdagswahl in’n Mai 1924 is Meyer för’n Wahlkreis 16 (Süüdhannover-Bruunswiek) in’n tweten Rieksdag von de Weimarer Republik wählt worrn. Nadem he bi de Rieksdagswahl in’n Dezember 1924 ok wedder en Mandaat wunnen hett – ditmaal in’n Wahlkreis 15 (Süüdhannover) – hett he noch bet Mai 1928 as Afornten von de WV to dat Parlament höört. Nadem de WV en Wahlbündnis mit de Düütsch-Hannöversche Partei (DHP) ingahn is, is Meyer bi de Wahl in’n Mai 1928 för de DHP in’n Rieksdag intagen. He is denn ok Maat von dat Direktorium von de DHP worrn. Bi de Wahl in’n September 1930 hett Meyer wedder den Wahlkreis 15 wunnen un seet bet Juli 1932 in’t Parlament. Bi de Rieksdagswahl in’n Juli 1932 hett he keen Mandaat kregen. Dat hett aver man veer Maand duurt, bet to de Rieksdagswahl in’n November 1932, dat he wedder in’t Parlament intagen is. Bi de Rieksdagswahl in’n März 1933 is he denn aver op Duur ut’n Rieksdag rutflagen.

In de Johren 1920 weer Meyer Vörsitter von’n Meiereeverband för’n Regerungsbezirk Stood un de Meiereegenossenschaft Bülkau. He weer in’n Kreisdag von’n Kreis Neehuus un von 1932 af an von’n Landkreis Land Hadeln. Dor weer he Viez-Vörsitter von’n Kreisutschuss. He weer Maat von de hannöversche Landweertschopssellschop un Utschussmaat von de Landweertschopskamer Hannover. Bi de Kark weer he Maat von’n Landskarkendag von de Evangeelsch-Luthersche Landskark Hannover un von’n Kreiskarkendag Neehuus.

Na’n Tweten Weltkrieg güng Meyer in de Neddersassische Landspartei (NLP), ut de 1947 de Düütsche Partei (DP) vörgahn is. För de NLP/DP weer he 1946 in’n Ernannten Bruunswiekschen Landdag un von 1946 bet 1948 in’n Landdag von Neddersassen. In de Johren 1945 bet 1948 weer he ok Landraad in’n Landkreis Land Hadeln. As Landraad keem Ernst-August von der Wense na em un in’n Landdag hett Heinrich Küver sien Mandaat övernahmen.