Handrij Kerk

Handrij Kerk (němsce Andreas Strauch; * 10. februara 1822 w Čornjowje, † 13. awgusta 1894 w Bukecach) bě serbski kubler a sakski sejmski zapósłanc.

Wón narodźi so jako syn žiwnosćerja w Čornjowje pola Bukec a wopytowaše wjesnu šulu we wosadnej wsy. Kerk nawukny tkalcowstwo, pozdźišo běše najprjedy najenk burskeho kubła w ródnej wjesce a potom kubler w bliskich Rodecach.

Handrij Kerk angažowaše so w zjawnym žiwjenju a wosebje w towarstwowym hibanju. Wón běše gmejnski předstejićer, sobustaw šulskeho a cyrkwinskeho předsydstwa w Bukecach, předsyda w lěće 1876 załoženeho Bukečanskeho serbskeho towarstwa a zapósłanc Hornjołužiskeho prowincialneho sejma. Přez 20 lět běše sobustaw Ratarskeho kreditneho towarstwa w Sakskej.

Wot 1871 do 1894 dźěłaše jako zapósłanc w konserwatiwnej frakciji druheje komory Sakskeho krajneho sejma w Drježdźanach, hdźež zastupowaše zajimy a prawa burow. W lěće 1872 namjetowaše we wobłuku nadźěłanja noweho sakskeho šulskeho zakonja wobkedźbowanje serbskeje rěče a literatury we wučbje. W Serbskich Nowinach wozjewješe rozprawy ze sejma a ekonomiske rozprawy.

Kerk bě wot 1848 sobustaw Maćicy Serbskeje.

• Nekrolog. We Łužicy 13 (1894), str. 69–70.
• Nekrolog. W Serbskich Nowinach 53, čo. 33 (18. awgusta 1894)

• Jan Cyž: Kerk, Handrij. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 247