Elen Loftesnes

Elen Loftesnes (fødd 9. januar 1905 i Sogndalsfjøra, død 2. desember 1979 same stad) var fotograf i Sogndal frå omkring 1930. Der hadde ho atelier og fotobutikk. Loftesnes fotograferte både portrett og landskap.

Elen var nummer fem i rekkja av sju søsken. To av dei levde ikkje opp. Foreldra var skysskar og skomakar Ola Olsson Loftesnes (1868-1944) og Eli Jakopsdotter Loftesnes (1873-1952). Elen overtok eigedomen Solheim Solheim etter foreldra, og truleg var det her ho hadde atelier og fotobutikk. Huset vart kalla «Stallen», og hadde Loftesnes pensjonat som nærmaste nabo. Elen var ugift.

I følgje Jan Talsethagen lærte Loftesnes fotografering av urmakar Ola O. Vatlestad, som var sjølvlærd. Ho dreiv både med portrettfotografering i atelier og produserte postkort med motiv frå Sogndalsområdet. Kunsten å handkolorere portrett skal ho òg ha lært seg. På byrjinga av 1950-talet leigde fotografen Leiv Bergum atelier hjå Loftesnes.

Loftesnes annonserte i lokale og regionale aviser, iallfall mellom 1932 og 1955. I ei annonse frå 1932 står det å lese: «Fotografering, fremkalling og kopiering. Min utdannelse og praksis garanterer fagmessig utførelse. Rimelige priser».

Negativ og positiv etter Elen vart funne av drivaren av Loftesnes pensjonat, Dagfinn Loftesnes (ikkje i slekt med Elen), og avlevert til Fylkesarkivet i Sogn og Fjordane i 1988. Materialet utgjer ca. 2,4 hyllemeter og er per 2018 ikkje ordna, men stikkprøver tyder på at mesteparten av bileta er frå 1950-talet. Arkivet etter Elen Loftesnes er eit viktig fotoarkiv i eit regionalt perspektiv, ettersom det utgjer eitt av berre to bevarte fotoarkiv etter dei kvinnelege fotografane frå Sogn og Fjordane. Samstundes er det også eitt av to bevarte fotografarkiv frå regionsenteret Sogndal.

I 2019 starta Fylkesarkivet i Sogn og Fjordane opp eit prosjekt for å ordne, digitalisere, registrere og gjere tilgjengeleg dette arkivet. Som del av prosjektet skal fylkesarkivet også samle inn historikk knytt til Elen Loftesnes si fotografverksemd. Prosjektet er mellom anna finasiert av Norsk kulturråd.

• Bilete av Elen Loftesnes ved Sogn og Fjordane fylkesarkiv
• Det finst og eit bilete av Loftesnes frå Hermansverk i Billedsamlingen ved UBB med gummistempel.

1. ↑ Talsethagen, s. 26-27
2. ↑ Annonse i Sogningen 28. oktober 1932.
3. ↑ fylkesarkivet.no - Prosjektstøtte til Fylkesarkivet)

• Ole O. Loftesnæs i Folketeljinga 1910 frå Digitalarkivet. (Sogndal herred)
• Eli J. Loftesnæs i Folketeljinga 1910 frå Digitalarkivet. (Sogndal herred)
• Ole Olsen Vatlestad i Folketeljinga 1910 frå Digitalarkivet. (Sogndal herred)
• Bonge, Susanne (1980). Eldre norske fotografer. Universitetsbiblioteket i Bergen. ISBN 8271300148. 
• Bergum, Leiv (2007). Sogndal. Skald. s. 40. ISBN 9788279591108.  Bilete av fotobutikken til Elen Loftesnes.
• Dødsannonse i Bergens tidende 5. desember 1979, s. 34.
• Elen Loftesnes i Folketeljinga 1910 frå Digitalarkivet. (Sogndal herred).
• Elen Loftesnes i Historisk befolkningsregister.
• Elen Loftesnes på Digitalt museum.
• Elen Loftesnes på KulturNav.
• Østevik, Elin (2008). Fotobevaring. Eksponert: kulturhistorisk fotografi i Sogn og Fjordane. Leikanger: Sogn og Fjordane fylkeskommune, Fylkesarkivet. s. 44. ISBN 9788292211090. 
• Talsethagen, Jan: Lokale fotografar/utgjevarar av postkort frå Sogndal. I: ...so han sa..., hausten 2006, s. 26-27.
• Timberlid, Jan Andersog Berit Selseng: Sogndal bygdebok. Bd. 1 og 2: Gardar og folk i Stedje sokn. Sogndal sogelag, 2007.