![](https://pplstatic.nyc3.cdn.digitaloceanspaces.com/static/images/dummy-gradient.jpg)
Quick Facts
Biography
Hi Dominador "Doms" Pagliawan in usa nga Waray artist tikang ha Catbalogan City, natawo han Nobyembre 11,1966. Nag-aangkon hiya hin damo nga talento ha pagsurat, ha musika, ha visual arts, ngan iba pa.
Paragsurat hiya hin siday, haliput nga susumaton, nobela, essay, ngan mga artikulo ha pahayagan. Usa gihap hiya nga kompositor, magkaranta, ngan recording artist. Damo an iya nadaugan ha dirudilain nga lokal, nasyonal, ngan Internasyonal nga mga paisan-isan sugad ha pagsurat hin mga karantahon, siday, susumaton, ngan pagdrowing/pag-painting hin mga obra biswal. Nakaupat na hiya hin music album, duha nga Winaray, usa nga Tinag-alog, ngan usa nga Ininglis. Kartonista ngan kolumnista hiya han pahayagan nga Leyte Samar Daily Express. Labut hini, usa gihap hiya nga pintor ngan skulptor, nakadamo pagkaada hin solo exhibits. Upat ka beses hiya nagin writing fellow ha mga UP creative writing workshops ha iba-iba nga lugar ha Pilipinas.
Usa nga radio brodkaster ngan mamamahayag ha telebisyon ha (Catbalogan, Samar), hiya in nagtapos kumo valedictorian ha elementarya, cum laude ha kolehiyo, regional winner han Ten Outstanding Graduate Award '92, ngan national finalist han Ten Outstanding Students of the Phillippines '92.
Anay propesor ha Leyte Normal University diin hiya ginkilala sugad nga Artist of the Year' (2017), nagin-propesor gihap hiya ha AMA University (Main Campus) Quezon City Kon diin kumarawat hiya hin pasidungog nga Most Outstanding Teacher (2020), ngan ha Samar College, Catbalogan City.
Nagtapos hiya ha mga degree nga BS Education (BSED English), Master of Arts in Literature (MA Lit.), ngan Doctor of Arts in Literature and Communication (DA Litcom). Han tuig 2021, nagdaug hiya hin international award kumo Ulirang Guro.
Labot han iya mga kontribusyon nga research articles ha mga international journals, pito (7) na nga mga libro an iya nasurat ngan napublisar. Hiya an nakagsurat ngan naka-publish han siyahan, orihinal nga nobela ha literatura Winaray nga may titulo: Tabsik hin Kagamhanan.
Ha journalism ngan academe, nasurat hiya ha English; pero ha literatura nga panuratan, nasurat hiya kaurugan ha Winaray, an iya pinulongan.
Pira hin mga awarding bodies ngan ahensya Kon kanay kumarawat hiya hin mga pasidungog amo an masunod: United Nations, European Union, Filipino Migration in Hawaii, United Federation of Fil-Am Educators, National Commission for Culture and the Arts, Gawad Komisyon, Department of Health, RFM Group of Companies, University of the Philippines, AMA University, Leyte Normal University, Eastern Visayas State University, BALAUG Arts Society, IBABAO Arts Council, Bombo Radyo Philippines, City of Tacloban, ug iba pa.
Tanan han iya mag-upay nga nahimo in iya ginhalad ha Makagarahom labaw han ngatanan, ha iya pamilya, ha mga igkasi-Waraynon, ngan ha bug-os nga katawhan.