Conradin de Flugi

Conradin de Flugi, cun num cumplet Conradin Flugi d'Aspermont (* 22 da settember 1787 a San Murezzan; † 17 da matg 1874 a Cuira) è stà in poet rumantsch.

Conradin de Flugi è naschì l'onn 1787 a San Murezzan. El e stà per curt temp scolar a l'Institut a Porta a Ftan e suenter è el ì a scola dus onns a Cuira. Cun 14 onns ha el cumenzà ses giarsunadi a Lindau. Silsuenter è el stà activ a Genova, Pisa e Livorno. Fin il 1815 è Flugi stà en servetsch dal retg Joachim Murat da Napel. Cur che quel reginam è crudà, è Flugi turnà l'onn 1823 in patria, nua ch'el fascheva da pur a Valchava fin il 1828. Lura è el turnà a San Murezzan, nua ch'el è daventà l'emprim e principal promotur dal svilup da San Murezzan sco lieu da cura. El ha tranter auter contribuì a la fundaziun da la Societad da las funtaunas termalas. L'onn 1834 è Flugi sa domicilià a Cuira per pussibilitar a ses uffants lur furmaziun.

Durant ses temp a l'ester ha Flugi cumenzà a scriver poesias. El vegn oz descrit sco piunier da la lirica rumantscha d'emigrants. Il 1845 è cumparida sia collecziun da poesias Alchünas rimas romaunschas, che ha vis il 1861 ina secunda ediziun revedida ed augmentada. Il 1894, ventg onns suenter sia mort, è il tom vegnì restampà sut il titel Poesias en la stamparia da Simon Tanner a Samedan.

• Alchünas rimas rumauntschas offertas en favur dels disfortünos abitants da Felsberg. Frers Sutter, Coira 1845.
• Alchünas rimas rumauntschas revisas et aumentadas. Pargaetzi e Felix, Coira 1861.
• Rimas. Stamparia da Simon Tanner, Samedan 1894.

• Conradin de Flugi en il Lexicon istoric retic
• Peider Lansel: Musa ladina. Antologia da la poesia engiadinaisa moderna, precedüda d'üna cuorta survista da nossa litteratura poetica. Engadin Press, Samedan 1910.
• Alcünas Rimas Romanschas