Christoph Schlencker

Chryša Šlenkar (němsce Christoph Schlencker abo Schlenker; * 4. septembra 1674 w Róžanach pola Lubija, † 24. meje 1728 w Poršicach) bě serbski ewangelski farar a nabožinski prócowar.

Wón narodźi so jako syn zahrodnika njedaloko Lubija, hdźež wopyta tež šulu. Wot 1694 studowaše w Lipsku teologiju. Swoje prěnje farske městno měješe w lětomaj 1706/07 w Radšowje. Wot 1707 do 1716 skutkowaše jako diakon w Ketličanskej wosadźe, 1716–18 bě diakon a serbski prědar w Lubiju a 1718 přewza Poršisku wosadu, hdźež hač do swojeje smjerće wosta. Jeho narowny pomnik nadeńdźe so při kěrchowskej muri w Poršicach pódla sewjernych wrotow.

Šlenkar wuda w lěće 1722 Der kurzgefaßte kleinere Himmelsweg, deutsch und wendisch (digitalizat) a Der kurzgefaßte größere Himmelsweg, deutsch und wendisch (digitalizat) z pokiwami za serbske čitanje a pisanje. Druha mjenowana kniha bu w lěće 1741 znowa wudata a słužeše hač do 1770 jako čitanka w serbskich šulach.

• Rudolf Kilank: Šlenkar, Chryša. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 545