Bayram Budaqov

Bayram İsmayıl oğlu Budaqov (8 yanvar 1994, Sabirkənd, Marneuli rayonu – 10 oktyabr 2020, Odessa) — hücumçu mövqeyində çıxış etmiş Ukrayna və Azərbaycan futbolçusu.

Klub karyerası

Bayram Budaqov 8 yanvar 1994-cü ildə Gürcüstanın Marneuli bələdiyyəsinin Sabirkəndkəndində anadan olub. Ukraynanın "XQVUFK-1 Xarkov", "Metallist Xarkov", "İliçyovets Mariupol" və "Dnepr" komandalarının yetirməsidir. Sonuncunun heyətində 2011-2014-cü illər aralığında əvəzedicilərin çempionatında 55 oyun keçirib, 9 qol vurub. 2014-cü ildə "Dnepr"lə müqaviləsi başa çatan Budaqov komandanı tərk edib.

2014-cü ilin iyun ayında "AZAL" və "Xəzər Lənkəran", iyul ayında "Qəbələ", 2015-ci ilin mart ayında isə "Neftçi" komandasında baxışda olub. 2016-cı il qış transfer pəncərəsi dönəmində "Xəzər Lənkəran"la müqavilə bağlayıb. 3 aprel 2016-ci ildə "Qarabağ"a qarşı oynanılan görüşdə yeni komandasında debüt edib. "Xəzər Lənkəran"ın heyətində ilk və yeganə qolunu 20 may 2016-ci ildə "Rəvan"ın qapısından keçirib.

2016-2017 mövsümünü Azərbaycan Birinci Liqasında mübarizə aparan "Səbail"in heyətində keçirib. Divizionun 13-cü turunda "Bakılı"nın,17-ci turunda isə "Göyəzən"in qapısından 4 qol keçirərək pokerə imza atıb.

Milli karyerası

Budaqov Azərbaycanın 19 və 21 yaşlılardan ibarət millilərinin üzvü olub. 2012-ci ildə 19 yaşlılardan ibarət millinin heyətində Avropa çempionatının seçmə mərhələsində 3 oyun keçirib, 2 qol vurub.

Bayram Budaqov 10 oktyabr 2020-ci ildə Ukraynanın Odessa şəhərində qətlə yetirilib. Budaqovun yaxın qohumu Yaqub Acalovun sözlərinə görə, qətlə səbəb Instagramda paylaşım olub. Belə ki, 24-25 yaşlı oğlan Bayramı çox kobud şəkildə təhqir edib, bundan sonra onlar vəziyyəti aydınlaşdırmaq üçün görüşmək qərarına gəliblər. Görüş zamanı tərəflər arasında mübahisə yaranıb və dava düşüb. Qəfildən oğlan Budaqovun qarnına və ürəyinə 6-7 bıçaq zərbəsi endirib və qaçıb. Yaralı Budaqov maşında onu gözləyən Acalovun yanına gələrək bıçaqlandığını söyləyib və xəstəxanaya aparılmasını istəyib. Bayram dərhal şiddətli ağrı hiss etməyib və maşınla xəstəxanaya çata bilib. Xəstəxanada Bayram hətta tibb bacılarına necə və harasından vurulduğunu başa salıb. 5-10 dəqiqə sonra Budaqov əməliyyat masasına uzanıb, lakin daxili qanaxma baş verdiyindən onu xilas etmək mümkün olmayıb.