Quick Facts
Biography
Anton' Bastianu Lucciardi (1771-1860) hè statu un pueta è scrivanu corsu.
Biugrafia
Anton' Bastianu Lucciardi nascì d'aprile in u 1771 in Santu Petru di Tenda. Era u figliolu di Dumenicu Maria Lucciardi è di Maria Rosa Castagno. Fù battizatu u 14 aprile di u 1771. Era cugnumatu "Prete Biasgiu" chì essendu ghjovanu, cunsigliatu da u ziu, u prete Paulu Maria Lucciardi, era distinatu à esse prete, ma rinunciò finalmente è scelse a vita civile. Per via di quessa, u cugnome li firmò tutta a so vita. Firmò catolicu è pritinu chì durente a so vita, assistia ogni ghjornu à a messa. Fù maestru di scola, nenzu a legge nant'à e scole di u 1833, è facia parte di A Cunfraterna Santa Croce di Santu Petru, essendu priore.
Anton' Bastianu Lucciardi era l'arcibabbone di u pueta Ghjuvan Petru Lucciardi. In e so Note biografiche, scritte in u 1926 è publicate in a rivista U Fucone, Ghjuvan Petru Lucciardi ci discrive u so arcibabbone:
| « Era un omu avenente è à la manu cun tutti. Grande di taglia, ben prupurziunatu, l'ochji vivi è neri, avia un'eria patriarcale cù a so capillera bianca è abundente chì l'inquatrava a so faccia cume un'aureola. A so voce bench'è forte, era dolce è carizzente, cù una gran facilità di parolla, accumpagnata da gesti assai espressivi. » |
Anton' Bastianu Lucciardi morse u 14 di dicembre di u 1860, à l'età di nuvanta anni, in u so paese di Santu Petru di Tenda.
Opere
Parechji di i testi d'Anton' Bastianu Lucciardi funu publicati in e riviste è in i ghjurnali cum'è L'Annu Corsu, L'Almanaccu di A Muvra o L'Almanacco del Pescatore di Chiaravalle.
Puesia
- Pè a Traversa (in Bastia)
- Lamentu di Togliaccia
- À i Cantarini Vezzolesi: cumprende 17 sistini.
- A calunniatrice
- La vietola di prete Vincenzu: cumposta da 19 sistini, publicata in L'Almanaccu di A Muvra per 1929.
- Lamentu sopra à a morte di u gallu di Vechjolu: cumpostu da 22 ottave.
- Lamentu sopr’a morte di u cane di Masgiolu : cumprende 25 sistini.
- Lamentu di Custantinu, u cane di Peppinellu: cumprende 21 sistini.
- Voceru è Testamentu di Mamma Mozza: cumpostu da 47 sistini.
- Voceri è Canzone: una racolta di e so puesie.
Teatru
- Mamma Sò: una cummediola in un attu, publicata in L'Almanacco del Pescatore di Chiaravalle.
Note
Bibliugrafia
- Geniu Gherardi (2011) I Lucciardi - Una famiglia corsa di pueti è di maestri di scola, Edizione Albiana
- Ghjuvan' Petru Lucciardi (1927), Anton' Sebastianu Lucciardi dettu Prete Biasgiu (Note biografiche), U Fucone, rivista di litteratura è di studii corsi
Da vede dinù
- Ghjuvan Petru Lucciardi
- Santu Petru di Tenda