Adolfo Campos Panadeiros

Adolfo Campos Panadeiros, nado en Dozón o 1 de agosto de 1934, é un empresario e político galego, alcalde de Dozón de 1987 a 2020.

Como empresario é presidente de Nucamsa e administrador do Matadoiro Comarcal de Deza Lalín, ademais de rexentar unha gasolineira.

Emigrou a Venezuela. Retornou a mediados dos sesenta e instalouse en Lalín, invertendo en negocios de hostalería e espectáculos e despois nunha fábrica de pensos. Comezou a súa carreira política como concelleiro de Lalín en 1976. Afiliouse á UCD e nas primeiras eleccións democráticas presentouse no segundo posto desa candidatura en Lalín e foi elixido concelleiro. En 1983 encabezou a lista do Partido Galeguista á alcaldía de Dozón que acadou cinco concelleiros, pero non obtivo a maioría. Nas eleccións municipais de 1987 foi o cabeza de lista de Independentes de Dozón, que aínda que só obtivo 3 dos once concelleiros, grazas a unha tripla alianza logrou proclamarse alcalde. Conseguiu a maioría absoluta nas municipais de 1991, xa no Partido Popular. Desde entón revalidou sempre a maioría.

Foi condenado por prevaricación en febreiro de 2008 a nove anos de inhabilitación por adoptar unha serie de resolucións contrarias aos dereitos da funcionaria municipal Ana Lois Navaza, que o denunciou por acoso laboral. Logo da apelación de Campos, a Audiencia Provincial declarou en xullo de 2008 a nulidade parcial da sentenza e o reenvío da causa ao Xulgado do Penal para que ditase unha nova resolución.

En novembro de 2015 foi detido no marco da Operación Qatedra, pedindo días despois a súa baixa como militante do PP, e continuando na alcaldía como non adscrito.

En xuño de 2020 dimitiu de alcalde e de concelleiro, por razóns de saúde, e foi substituído na alcaldía polo fillo Adolfo Campos Vázquez. Campos Vázquez xa viña presidindo os plenos municipais desde había uns meses, precisamente pola saúde do pai.

Outros artigos

• Eleccións municipais en Dozón