Yolanda Huergo

Yolanda González Huergo (30  de mayu de 1971, Xixón) ye una política asturiana d'esquierdes. Foi miembru d'Unidá Nacionalista Asturiana y Compromisu. Anguaño pertenez a Podemos y ye conceyala d'esti nel conceyu de Xixón.

Yolanda Huergo ñaz en Xixón el 30 de mayu 1971, vivió nel barriu de Roces. Pasó la mayor parte de la so infancia na parroquia d'Argüeyes (Siero) colos sos güelos. La so vida ta dedicada al activismu feminista, al activismu polos derechos llingüísticos de los asturfalantes y al activismu polos drechos humanos. Ye una de les polítiques asturianistes más conocíes anguaño, siendo cofundadora d'Unidá Nacionalista Asturiana (UNA) y cofundadora de Compromisu por Asturies (CxAst).

Ta llicenciada en drechu pola Universidá d'Uviéu y ye especialista n'urbanismu. Ye funcionaria llocal dende 2004.

Nes eleiciones autonómiques d'Asturies de 2011, foi la númberu 2 de la llista de la coalición Bloque por Asturies-Unidá Nacionalista Asturiana (Compromisu por Asturies). Ensin algamar representación na Xunta Xeneral del Principáu esti partíu, preséntase otra vegada, nesta ocasión a les eleiciones autonómiques d'Asturies de 2012, repitiendo'l puestu en llistes.

En 2014 Yolanda s'afilia a Podemos; Compromisu por Asturies aprobó sofitar el proyeutu de Pablo Iglesias, siendo esti l'ala asturianista d'esta formación n'Asturies.

En 2018 anuncia la so intención de querer ser candidata de Podemos Xixón a les eleiciones municipales, disputándo-y la candidatura a Rosa Espiño. Finalmente, la so candidatura foi escoyida col sofitu del 51,68% de los inscritos d'esta formación nel conceyu de Xixón en febreru de 2019. Nes eleiciones municipales de Xixón, Yolanda algama 16.128 votos y el puestu de conceyala, siendo esti'l so cargu na actualidá.

• Wikimedia Commons acueye conteníu multimedia sobre Yolanda Huergo.

• Yolanda Huergo en Twitter

• Yolanda Huergo en Facebook