Vinces Mudrou

Вінцэсь Мудроў (нар. 11 верасня 1953, Полацк) — беларускі празаік і журналіст.

Нарадзіўся ў сям’і савецкага афіцэра, рускага па нацыянальнасці. Дзяцінства і юнацтва правёў у Беларусі, на радзіме маці. Вучыўся ў Наваполацкай сярэдняй школы № 2. Скончыў Наваполацкі політэхнічны інстытут (1976). Працаваў інжынерам на прадпрыемствах Наваполацку, а пасля Ямала-Ненецкай аўтаномнай акругі РСФСР. Са школьных гадоў займаўся грамадскай дзейнасцю, пастаянна адчуваў кантроль КДБ. У канцы 1980-х вярнуўся ў Беларусь. У 1990-х рэдагаваў літаратурны альманах «Ксэракс Беларускі». Працаваў карэспандэнтам Радыё «Свабода». Сябра Беларускага ПЭН-цэнтру (выйшаў у 2019), Саюза беларускіх пісьменнікаў і Таварыства вольных літаратараў. Жыве ў Наваполацку.

У старэйшых класах (канец 1960-х) вывешваў на школьнай дошцы аб’яваў праграмы перадач «Голаса Амерыкі», «Радыё Свабода» і іншых заходніх радыёстанцый, за што адчуваў ціск з боку школьнай адміністрацыі. Крытычна ставіўся савецкай рэчаіснасці.

Пад час вучобы ў інстытуце стаў ініцыятарам выдання рукапіснага літаратурна-мастацкага часопіса «Блакітны ліхтар». Разам з групай аднадумцаў (Валерый Шлыкаў, Анатоль Рыбікаў, Андрэй Грабаў і інш.) у 1971—1974 гадах выпусціў 15-ць нумароў часопіса. Разам з літаратурнымі матэрыяламі ў часопісе змяшчаліся публіцыстычныя творы з крытыкай палітыкі русіфікацыі ў БССР. Адзін з нумароў, цалкам падрыхтаваны В. Мудровым, змяшчаў яго погляд на праблемы беларускай мовы і яе перспектывы ва ўмовах СССР. У адным са сваіх вершаў В. Мудроў параўнаў беларусаў са зніклым народам этрускаў. Колькасць аўтараў і чытачоў часопіса ўзрастала, апроч Полацка і Наваполацку яго чытала пэўнае кола людзей у БДУ і іншых мінскіх ВНУ.

У 1974 годзе на след часопіса выйшаў КДБ, усе нумары «Блакітнага ліхтара» былі канфіскаваны. З В. Мудровым і іншымі выдаўцамі былі праведзены «прафілактычныя гутаркі», выпуск часопіса спыніўся. Па сканчэнні ў 1976 годзе сканчэнні інстытута В. Мудрову адмовілі ў прыёме на працу на наваполацкі завод «Вымяральнік» з прычыны палітычнай ненадзейнасці, бо завод належаў да ліку «абаронных» прадпрыемстваў.

У 2-й палове 1970-1980-х В. Мудроў актыўна займаўся капіраваннем і распаўсюджваннем забароненай у СССР літаратуры, у прыватнасці, твораў М. Булгакава «Ракавыя яйкі» і «Сабачае сэрца». Асаблівую ўвагу даваў распаўсюджванню навуковых і публіцыстычных матэрыялаў нацыянальнага характару — «Расейска-крыўскага (беларускага) слоўніка» В. Ластоўскага, часопіса «Крывіч», вершаў і паэм Ларысы Геніюш. В. Мудроў наведваў Л. Геніюш у Зэльве; у 1983 удзельнічаў у пахаванні паэтэсы, якая знаходзілася пад наглядам КДБ. У 1986 годзе супрацоўнікі КДБ падчас чарговай «прафілактычнай гутаркі» пагражалі выслаць яго за антысавецкую дзейнасць з Ямала-Ненецкай аўтаномнай акругі, дзе ён на той час працаваў.

Аўтар кніг прозы:

• «Жанчыны ля басейна» (1992),
• «Гісторыя аднаго злачынства» (1993),
• «Зімовыя сны» (1999),
• «Ператвораныя ў попел» (2005),
• «Альбом сямейны» (2007),
• «Багун» (2013),
• «Албанскае танга» (2016),
• «Страна огненных птиц» (2016),
• «Последняя репетиция» (2016),
• «Албанское танго» (2016),
• «Забойца анёла» (2017),
• «Помнік літары „Ў“» (2018),
• «Восень у Вільні» (2019),
• «Падшыванцы» (2020).

• Лаўрэат прэміі часопіса «Крыніца» (1998),
• Лаўрэат прэміі «Залаты апостраф» (2010),
• Трэцяе месца Прэміі Гедройца (2014) за зборнік апавяданняў «Багун»,
• Трэцяе месца Прэміі Гедройца (2018) за зборнік апавяданняў «Забойца анёла»,
• Лаўрэат прэміі "Празрысты Эол" (2019) за лепшую онлайн публiкацыю.

• Вінцэсь Мудроў // Літара.net: Персаналіі — Эл. рэсурс litara.net
• Арлоў У. Мудроў Вінцэсь // Дэмакратычная апазыцыя Беларусі: 1956—1991. Пэрсанажы і кантэкст. Менск: Архіў Найноўшае Гісторыі, 1999. — ISBN 985-6374-08-1
• Мудроў Вінцэсь // Часопіс «Наша Вера»: Аўтары — Эл. рэсурс media.catholic.by
• Люстэрка для героя нашага часу // Часопіс «ЛіМ»: http://www.zviazda.by/be/news/20181016/1539677510-nebashil-u-sercy
• Палявыя доследы душы// Часопіс «ЛіМ»: http://www.zviazda.by/be/news/20190822/1566505961-palyavyya-dosledy-dushy
• Меціны на снезе// Часопіс «ЛіМ»: http://www.zviazda.by/be/news/20191029/1572325666-meciny-na-sneze

• Творы В. Мудрова на Беларускай палічцы
• Старонка В. Мудрова ў інтэрнэт бібліятэцы Kamunikat.org
• Мудров В. Terra incognita посреди Европы // «Урал» 1996, № 8.