Quick Facts
Biography
თამაზ ბაძაღუა (დ. 1959 წანა, მარტვილიშ რაიონი — ღ. 5 გერგობათუთა, 1987 წანა) — ქორთუ დრამატურგი, პოეტი.
დებადჷ უჯვეშაშ ოფუტე ნახუნაოს, პედაგოგეფიშ პოლიკარპე და თალიკო ბაძაღუეფიშ ფანიას. ჸუნდჷ ჟირი და — დოდო დო ლეილა.
1975 წანას გაათუ ნახუნაოშ სკოლა დო კჷნე თე წანას ენირიცხჷ ქართიშ ივანე ჯავახიშვილიშ ჯოხონობაშ სახენწჷფო უნივერსიტეტიშ ფილოლოგიურ ფაკულტეტის. მაართა ომენცარე ნახანდი I კურსიშ სტუდენტიქ წჷმარინუ სტუდენტეფიშ 38 ომენცარე კონფერენციას "პერსონოლოგიური ანალოგია". II კურსიშ სტუდენტიქ 1977 წანას კჷნე სტუდენტეფიშ 39-ა ომენცარე კონფერენციას იკითხჷ ნახანდი: "მისტიკური სილამაზის გამოსახვა იოანე მტბევარის საგალობლებში"-ს, ხემანჯღვერი გოხოლჷდეს გ. ფარულავა. 1980 წანას თამაზიქ გაათუ უნივერსიტეტი, დოჭარჷ ოდიპლომე ნახანდი ოთარ ჭილაძეშ რომანშენ "გზაზე ერთი კაცი მოდიოდა". კჷნე თე წანას დიჭყჷ მუშობა ხანტილურ თანგუაშ თარ ორედაქციე კოლეგიას. 23 წანერქ 1982 წანას გჷშაშქჷ მაართა წინგი "მესამე ზარი". ფანიათ მუში ბორჯის, ახალობას აკოქიმინჷ.
1985 წანას გჷშმაშქუმალარობა "განათლებაქ" დოსტამბჷ თიშით თანგილი ჯაკომო ლეოპარდიშ ლერსეფი. თანგჷ პიერ პაოლო პაზოლინიშ, მიქელანჯელო ბუონაროტიშ, გიიომ აპოლინერიშ, რაინერ მარია რილკეშ ლერსეფი. თამაზი მუშენდჷ დრამატურგიასჷთ. თენა რდჷ ახალნორდი დრამატურგეფიშ ბიჭვინთაშ სემინარიშ უთირუ მაკათური. თიში პიესეფი იდგუმუდჷ რუსთავიშ, ქართიშ სანდრო ახმეტელიშ ჯოხონობაშ, ართი არტისტიშ თეატრეფც. თიში მაართა პიესა გოხოლჷდეს "იფიგენია" ოდო ეკონია "ღამე და თუთიყუში" 2001 წანას ართი არტისტიშ თეატრის დიდგჷ თიში პიესაქ "ღამე და თუთიყუში", სოდეთ როლი ილაჸაფჷ არტისტი დუტა სხირტლაძექ. თამაზიშ პიესეფი "რექვიემი ვერცხლის ქორწილისათვის", "ღუზა ჩაუშვი, ანგელოზო", "ძველი როიალი" წჷმოძინელო იდგუმჷდჷ თეატრეფიშ სცენეფს. პროზასჷთ ქოცადჷ ბედი, 1982 წანას "ცისკრის ბიბლიოთეკაშ" 3-4 ნომერს გჷმიბჟინუ თიში თხობელუაქ "დღე"
1987 წანაშ 5 გერგობათუთას პოეტი დო დრამატურგ თამაზ ბაძაღუაქ ფანიაწკჷმა ართო ტრაგიკულო მედინჷ.
2011 წანაშ 22 ღურთუთას საქორთუოშ საპატრიარქოწკჷმა რინელ ახალნორდობაშ შურიელი დო ინტელექტუალური გოვითარაფაშ ცენტრიშ პელეტის 17:00 საათის იმანჯჷ პოეტიშ დო დრამატურგიშ შინიშა მეჯღუნილ ონჯუაქ.