Mihrdat Amrikyan

Միհրդատ Հովհաննեսի Ամրիկյան (Հովհաննես Ամերիկյան) (1843, մայիսի 1 (13), գ. Ծինուբան (այժմ՝ Վրաստանի Ախալցխայի շրջանում) - 1879, փետրվարի 5 (17), Թիֆլիս), հայ դերասան, գրող։ Արևելահայ պրոֆեսիոնալ թատրոնի հիմնադիրներից։

Միհրդատ Ամրիկյանը ծնվել է Ախալցխայի Ծինուբան գյուղում։ Սովորել է տեղի ծխական դպրոցում, 1853-1858 թթ.` Թիֆլիսի Ներսիսյան դպրոցում։ Եղել է Ներսիսյան դպրոցի աշակերտական ներկայացումների կազմակերպիչներից։ 1860 թվականին Սարգիս Վանանդեցու «Միհրդատ» ողբերգության գլխավոր դերը հաջողությամբ կատարելու համար, ստացել է «Միհրդատ» անունը։ 1863 թվականից աշխատել է Պերճ Պռոշյանի, 1864 թվականից՝ Գևորգ Չմշկյանի թատերախմբերում։ Եղել է արևելահայ պրոֆեսիոնալ թատրոնի հիմնադիրներից, Գաբրիել Սունդուկյանի կերպարների առաջին և լավագույն մարմնավորողներից։

Եղել է թատերական քննադատ, երգիծաբան, հրապարակախոս։ Հետևել է Վ. Բելինսկու գեղագիտական սկզբունքներին։ Եղել է «Մշակ» թերթի առաջին աշխատակիցներից։ 1872-1873 թթ. ղեկավարել է երգիծանքի բաժինը «Չաքուճ» ստորագրությամբ, տպագրել է ֆելիետոնների շարք։

Գրել է ոտանավորներ, կատարել թարգմանություններ։

Հյուրախաղերով հանդես է եկել Ախալցխայում, Գորիսում, Քութայիսում, Գանձակում, Շուշիում, Ալեքսանդրապոլում, Երևանում։ 1874-1877 թթ. գործել է Կ. Պոլսում, բեմադրել է Շիլլերի «Ավազակներ», Սունդուկյանի «Պեպո» և այլ ներկայացումներ։

Նյութական ծանր վիճակի պատճառով վերադարձել է Թիֆլիս, ուր հիվանդացել և ինքնասպան է եղել։

• Զամբախով՝ Սունդուկյանի «Խաթաբալա»
• Սարգիս՝ Սունդուկյանի «էլի մեկ զոհ»
• Զիմզիմով՝ Սունդուկյանի Պեպո»
• Ֆրանց Սոոր՝ Շիլլերի «Ավազակներ»
• Կիվկիվ՝ Ն. Փուղինյանի «Դալալ Ղաղո»
• Կարապետ, Գասպար՝ Ս. Տեր-Գրիգորյանի «Էս էլ քի մոցիքլութին»
• Գասպար՝ Ս. Տեր-Գրիգորյանի «Նինոյին շնվիլը»
• Մեծ սատանա՝ Սունդուկյանի «Օսկան Պետրովիչը էն կինքումը»

• Սուրեն Հարությունյան, Միհրդատ Ամրիկյան, Երևան, 1959 թ.