Elmira Hekekyan
Quick Facts
Biography
Էլմիրա Աբրահամի Հեքեքյան (Աբրահամյան) (փետրվարի 29, 1928(1928-02-29), Գանձակ, ԱԽՍՀ, ԱԽՖՍՀ, ԽՍՀՄ - փետրվարի 20, 2019(2019-02-20), Երևան, Հայաստան), հայ ռեժիսոր, բեմադրիչ։ ՀԽՍՀ արվեստի վաստակավոր գործիչ (1986)։ ԽՍՀՄ հայրենական մեծ պատերազմի մասնակից։
Կենսագրություն
Էլմիրա Աբրահամյանը ծնվել է Գանձակում, Աբրահամ և Ռոզալիա Աբրահամյանների ընտանիքում: Մասնակցել է Երկրորդ համաշխարհային պատերազմին: 1949 թվականից աշխատել է Հայաստանի հանրային ռադիոյի խմբագրությունում: 1953 թվականին ավարտել է Երևանի գեղարվեստա-թատերական ինստիտուտը, 1975 թվականին Մոսկվայում կատարելագործվել հեռուստատեսության համամիութենական ինստիտուտի գլխավոր ռեժիսորների դասընթացներում։ 1946-1948 թվականներին աշխատել է Բաքվի Լևոն Երամյանի անվան, 1953-1957 թվականներին՝ Երևանի ռուսական թատրոններում, 1958 թվականից՝ ՀՀ հեռուստաստուդիայի ռեժիսոր։ 1953 թվականից (ընդհատումներով) դասավանդել է Երևանի պարարվեստի, երաժշտական ուսումնարաններում, ԵԹԱԻ-ում։ Հեղինակ է բազմաթիվ հեռուստահաղորդաշարերի՝ «Զրույցներ գեղագիտության մասին», «Գեղեցիկի աշխարհում», «Շախմատային այբուբեն», «Թատերական հուշեր», «Վարք ու բարք», «Հասմիկ» և այլն։ Նկարահանել է «Մինչև 16 տարեկաններին թույլատրվում է․․․» ֆիլմը (1964, Համամիութենական կինոփառատոնի առաջին մրցանակ, Պրահայի միջազգային կինոփառատոնի դիպլոմ, 1965)։ Լուիզա Սամվելյանի համագործակցությամբ ներկայացրել է համաշխարհային դրամատուրգիայի եզակի նմուշներ՝ բեմադրելով Արիստոֆանի «Ամպերը», Եվրիպիդեսի «Իֆիգենիան Ավլիսում» (երկուսն էլ՝ 1971), Ջ. Բրունոյի «Մոմակալը» (1973) և այլն։
Անդամակցություն
- Հայաստանի թատերական գործիչների միության անդամ, 1948
- Բնական գիտությունների եվրոպական ակադեմիայի անդամ, 2006
- Բնության և հասարակական գիտության միջազգային ակադեմիայի անդամ,2009
- Հայաստանի Հեռուստատեսության և ռադիոյի ակադեմիաների իսկական անդամ, 2011՝
- «Հայաստանի փոքրիկ երգիչներ» միջազգային ասոցիացիայի փոխնախագահ, 1992
Պարգևներ
- ԽՍՀՄ Պետռադիոյի պատվոգիր
- Համամիութենական կինոփառատոնի առաջին մրցանակ, 1964
- Պրահայի միջազգային կինոփառատոնի դիպլոմ, 1965
- ՀԽՍՀ Գերագույն խորհրդի պատվոգիր, 1975
- ՀԽՍՀ արվեստի վաստակավոր գործիչ, 1986
- ՀՀ թատերական գործիչների միության ոսկե մեդալ, 2007
- ՀՀ մշակույթի նախարարության ոսկե մեդալ, 2007
- ՀՀ կրթության և գիտության նախարարության ոսկե մեդալ, 2007
- «Մարշալ Բաղրամյան» մեդալ, 2008
- «Գարեգին Նժդեհ» մեդալ, 2009
- Մովսես Խորենացու մեդալ 2018
Ընտանիք
- Հայր՝ Աբրահամ Աբրահամյան, զինվորական:
- Մայրը՝ Ռոզալիա Աբրամովնա Աբրահամյան, Հայրենական մեծ պատերազմի կամավոր, պատվավոր մանկավարժ, ռուսաց լեզվի և գրականության ուսուցիչ:
- Դուստր՝ Աննա Հեքեքյան, հայ կինոռեժիսոր, սցենարիստ
- Որդի՝ Տիգրան Հեքեքյան, Սայաթ-Նովայի անվան երաժշտական դպրոցի տնօրեն, «Փոքրիկ երգիչներ» երգչախմբի հիմնադիր և գեղարվեստական ղեկավար։
Ծանոթագրություններ
- ↑ LLC Helix Consulting։ «Մահացել է Էլմիրա Հեքեքյան-Աբրահամյանը»։ www.panorama.am (անգլերեն)։ Վերցված է 2019-02-20
- ↑ «Эльмира Экекян»։ Кино-Театр.РУ։ Վերցված է 2019-02-28
- ↑ Ով ով է. Հայեր. Կենսագրական հանրագիտարան, հատոր առաջին, Երևան, 2005:
- ↑ «AV Production - Էլմիրա Հեքեքյան»։ avproduction.am։ Վերցված է 2019-02-20
- ↑ «Экекян Эльмира Абрамовна - Europäische Akademie der Naturwissenschaften»։ eanw.info։ Վերցված է 2019-02-28
Այս հոդվածի նախնական տարբերակը կամ նրա մասը վերցված է Հայկական համառոտ հանրագիտարանից,որի նյութերը թողարկված են՝ Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։ |