Zygmunt Ksawery Grabowski

Зыгмунт Ксаверый Грабоўскі (польск.: Zygmunt Ksawery Grabowski; ? — 13 снежня 1808) — ураднік Вялікага Княства Літоўскага.

Паходзіў са шляхецкага роду Грабоўскіх герба «Окша». Нарадзіўся ў сям’і Тамаша Мар’яна і Ганны з Ружыцкіх.

Шамбялян, крайчы вялікі літоўскі ў 1784—1793 гадах, пасол на Чатырохгадовы сойм з 1790 года. Удзельнічаў у дысідэнцкім руху. У час праўлення Таргавіцкай канфедэрацыі у 1792—1793 гадах член Пастаяннай Рады (інфармаваў пра яе дзейнасць эмігрантаў-патрыётаў).

20 мая 1780 года ў Мінску Мазавецкім ажаніўся з Марыянай Пелагіяй з Патоцкіх, дачкой Юзафа і Пелагіі. Ад яе дзеці:

• Пелагія (1787—1848), у шлюбе з Міхалам Гжэгажам Грабоўскім (1758—1822);
• Аляксандр (каля 1790—1812) быў генералам расійскай арміі, загінуў у 1812 годзе ў бітве з французамі пад Красным;
• Ксаверый (каля 1790 — ?) быў камергерам, маршалкам шляхты Ваўкавыскага павета. У шлюбе з Кацярынай Мелін.

• Грабоўскія // Вялікае княства Літоўскае: Энцыклапедыя. У 3 т. / Рэдкал.: Г. П. Пашкоў (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2005. — Т. 1: Абаленскі — Кадэнцыя. — 688 с. — ISBN 985-11-0314-4 (т. 1), ISBN 985-11-0315-2.