Yashoda Murmu

ᱭᱚᱥᱳᱫᱟ ᱢᱩᱨᱢᱩ (ᱡᱟᱱᱟᱢ ᱺ ᱒᱔ ᱡᱩᱞᱟᱭ ᱑᱙᱖᱔) ᱫᱚ ᱢᱤᱫ ᱧᱩᱛᱩᱢᱟᱱ ᱥᱟᱱᱛᱟᱲᱤ ᱚᱱᱚᱬᱦᱤᱭᱟ. ᱟᱨ ᱛᱚᱨᱡᱚᱢᱤᱭᱟ. (Translator) ᱠᱟᱱᱟᱭ ᱾ ᱥᱚᱨᱠᱟᱨᱤ ᱪᱟ.ᱠᱨᱤ ᱥᱟᱶᱼᱥᱟᱶ ᱛᱮ ᱟᱭᱢᱟ ᱯᱚᱛᱚᱵ ᱯᱩᱛᱷᱤᱭ ᱚᱞ ᱟᱠᱟᱫᱼᱟ ᱚᱱᱟ ᱥᱟᱶᱛᱮ ᱮᱴᱟᱜ ᱯᱟ.ᱨᱥᱤ ᱨᱮᱭᱟᱜ ᱧᱩᱛᱩᱢᱟᱱ ᱫᱟᱢᱟᱱ ᱯᱩᱛᱷᱤ ᱠᱚ ᱥᱟᱱᱛᱟᱲᱤ ᱯᱟ.ᱨᱥᱤ ᱨᱮᱭ ᱟ.ᱨᱩ ᱟᱠᱟᱫᱼᱟ ᱟᱨᱵᱟᱝ ᱮ ᱛᱚᱨᱡᱚᱢᱟ ᱟᱠᱟᱫᱼᱟ ᱾

ᱭᱚᱥᱳᱫᱟ ᱢᱩᱨᱢᱩ ᱫᱚ ᱢᱤᱫ ᱦᱟᱸᱥᱫᱟᱜ ᱵᱟ.ᱠᱷᱳᱞ ᱨᱮᱭ ᱡᱟᱱᱟᱢ ᱟᱠᱟᱱᱟ ᱾ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱭᱟᱜ ᱥᱟᱨᱟᱭᱠᱮᱞᱟ ᱠᱷᱚᱨᱥᱚᱶᱟ ᱦᱚᱱᱚᱛ (ᱯᱟ.ᱦᱤᱞᱟᱜ ᱫᱚ ᱥᱤᱝᱵᱷᱩᱢ ᱡᱤᱞᱞᱟ), ᱛᱷᱟᱱᱟ ᱨᱟᱡᱽᱱᱚᱜᱚᱨ, ᱟ.ᱛᱩ ᱡᱩᱢᱟᱞ (ᱡᱷᱩᱢᱟ.ᱲ) ᱨᱮ ᱟᱡᱟᱜ ᱡᱟᱱᱟᱢ ᱫᱚ ᱦᱩᱭ ᱟᱠᱟᱱᱟ ᱒᱔ ᱡᱩᱞᱟᱭ ᱑᱙᱖᱔ ᱥᱟᱞᱮ ᱨᱮ ᱾ ᱟᱡᱤᱡ ᱡᱟᱱᱟᱢ ᱵᱟᱵᱟ ᱦᱟᱜ ᱧᱩᱛᱩᱢ ᱫᱚ ᱵᱚᱸᱜᱟᱛᱟᱞᱟ ᱟᱠᱟᱱ ᱫᱮᱵᱽᱨᱟᱡᱽ ᱦᱟᱸᱥᱫᱟᱜ ᱟᱨ ᱟᱭᱳᱣᱟᱜ ᱧᱩᱛᱩᱢ ᱫᱚ ᱯᱟᱨᱵᱚᱛᱤ ᱦᱟᱸᱥᱫᱟᱜ ᱛᱟᱦᱮᱸ ᱠᱟᱱᱟ ᱾

ᱟᱡᱟᱜ ᱯᱩᱭᱞᱩ ᱥᱮᱪᱮᱫ ᱫᱚ ᱢᱟᱢᱚ ᱚᱲᱟᱜ ᱟ.ᱛᱩ ᱨᱟᱡᱽᱫᱚᱦᱟ, ᱠᱷᱮᱨᱣᱟᱲ ᱢᱤᱰᱤᱞ ᱟᱥᱲᱟ ᱠᱷᱚᱱ ᱮ ᱟᱢᱮᱴ ᱟᱠᱟᱫᱼᱟ ᱾ ᱟᱡᱟᱜ ᱮᱭᱟᱭ ᱟᱨ ᱤᱨᱟ.ᱞ ᱪᱟᱱᱚᱪ ᱨᱮᱭᱟᱜ ᱥᱮᱪᱮᱫ ᱫᱚ ᱮᱥᱴᱤᱼᱡᱟᱵᱷᱤᱭᱚᱨ ᱜᱟᱞᱥ ᱦᱟᱭᱤᱥᱠᱩᱞ, ᱪᱟᱺᱭᱵᱟᱥᱟ ᱠᱷᱚᱱ ᱮ ᱥᱟ.ᱛ ᱟᱠᱟᱜᱼᱟ ᱾ ᱤᱨᱟ.ᱞ ᱪᱟᱱᱚᱪ ᱥᱟ.ᱛ ᱠᱮᱫ ᱛᱟᱭᱚᱢ ᱫᱚ ᱟᱡ ᱫᱚ ᱢᱩᱨᱢᱩ ᱵᱟ.ᱠᱷᱳᱞ ᱨᱮ ᱢᱟ.ᱱ ᱦᱚᱨᱤᱯᱚᱫᱚ ᱢᱩᱨᱢᱩ ᱴᱷᱮᱱ ᱠᱚ ᱜᱚᱝ ᱠᱟᱫᱮᱭᱟ ᱾ ᱩᱱ ᱡᱚᱦᱚᱜ ᱫᱚ ᱟᱡ ᱫᱚ ᱥᱩᱢᱩᱝ ᱑᱔ ᱥᱮᱨᱢᱟ ᱩᱢᱮᱨ ᱛᱟᱭ ᱛᱟᱦᱮᱸ ᱠᱟᱱᱟ ᱾ ᱵᱟᱯᱞᱟ ᱛᱟᱭᱚᱢ ᱦᱚᱸ ᱟᱡ ᱫᱚ ᱟᱡᱟᱜ ᱯᱚᱲᱦᱚᱱ ᱮ ᱛᱚᱸᱜᱮ ᱫᱚᱦᱚ ᱠᱮᱫ ᱜᱮᱭᱟ ᱟᱨ ᱱᱚᱝᱠᱟᱛᱮ ᱟᱡᱟᱜ ᱜᱮᱞ ᱪᱟᱱᱚᱪ ᱫᱚ ᱑᱙᱘᱑ ᱥᱟᱞᱮ ᱨᱮ N.D. Rungta girl's High School, Chakulia ᱠᱷᱚᱱ ᱮ ᱥᱟ.ᱛ ᱠᱮᱜᱼᱟ ᱾ ᱑᱑ ᱪᱟᱱᱚᱪ ᱞᱟ.ᱜᱤᱫ ᱟᱨᱭᱚ ᱠᱚᱱᱭᱟ ᱢᱟᱨᱟᱝ ᱵᱤᱨᱫᱟ.ᱜᱟᱲ ᱠᱚᱞᱠᱟᱛᱟ ᱨᱮ ᱮᱰᱢᱤᱥᱳᱱ ᱮ ᱦᱟᱛᱟᱣ ᱠᱮᱫ ᱛᱟᱭᱚᱢ ᱟᱡᱤᱡ ᱯᱩᱭᱞᱩ ᱜᱤᱫᱽᱨᱟ.ᱦᱟᱜ ᱡᱟᱱᱟᱢ ᱠᱷᱟ.ᱛᱤᱨ ᱯᱟᱲᱦᱟᱣ ᱫᱚ ᱴᱷᱟᱠᱮᱫ ᱫᱚᱦᱚ ᱦᱩᱭ ᱟᱫᱮᱭᱟ ᱑᱙᱘᱒ ᱥᱟᱞᱮ ᱨᱮ ᱾

ᱟᱡᱤᱡ ᱫᱚᱥᱟᱨ ᱠᱩᱲᱤ ᱜᱮᱫᱽᱨᱟ. ᱑᱙᱘᱗ ᱥᱟᱞᱮ ᱨᱮᱭ ᱡᱟᱱᱟᱢ ᱮᱱᱟ ᱾ ᱟᱨ ᱤᱱᱟ. ᱥᱮᱨᱢᱟ ᱜᱮ clerk-cum-cashier ᱞᱮᱠᱟᱛᱮ ᱯᱚᱧᱡᱟᱵᱽ ᱟᱨ ᱥᱤᱸᱫᱽ ᱵᱮᱸᱠ, ᱡᱚᱱᱟᱞ ᱟ.ᱢᱟ.ᱞᱤ, ᱠᱚᱞᱠᱟᱛᱟ ᱨᱮ ᱮᱯᱚᱭᱮᱸᱴᱢᱮᱴ ᱮ ᱧᱟᱢ ᱠᱮᱜᱼᱟ ᱾ ᱤᱱᱟ. ᱛᱟᱭᱚᱢ ᱟᱨ ᱦᱚᱸ ᱟᱡᱟᱜ ᱯᱚᱲᱦᱚᱱ ᱮ ᱛᱚᱸᱜᱮ ᱫᱚᱦᱚ ᱠᱮᱫᱼᱟ ᱟᱨ IA ᱫᱚ ᱑᱙᱙᱐ ᱥᱟᱞᱮ ᱨᱮ ᱟᱨ BA ᱫᱚ ᱑᱙᱙᱕ ᱥᱟᱞᱮ ᱨᱮ LBSM ᱵᱤᱨᱫᱟ.ᱜᱟᱲ, ᱠᱚᱨᱚᱱᱰᱤ, ᱡᱟᱢᱥᱮᱫᱽᱯᱩᱨ ᱟᱱᱰᱟᱨ ᱨᱟᱧᱪᱤ ᱡᱮᱜᱮᱛ ᱵᱤᱨᱫᱟ.ᱜᱟᱲ ᱠᱷᱚᱱ ᱮ ᱥᱟ.ᱛ ᱠᱮᱜᱼᱟ ᱾ ᱟᱨ ᱟᱡᱟᱜ ᱢᱟᱥᱴᱚᱨ ᱰᱤᱜᱽᱨᱤ ᱫᱚ ᱒᱐᱐᱖ ᱥᱟᱞᱮ ᱨᱮ ᱥᱟᱱᱛᱟᱲᱤ ᱛᱮ ᱨᱟᱧᱪᱤ ᱡᱮᱜᱮᱛ ᱵᱤᱨᱫᱟ.ᱜᱟᱲ, ᱨᱟᱧᱪᱤ ᱠᱷᱚᱱ ᱮ ᱥᱟ.ᱛ ᱠᱮᱫᱼᱟ ᱾ ᱑᱙᱙᱕ ᱥᱟᱞᱮ ᱨᱮ ᱟᱡᱟᱜ ᱜᱨᱟᱡᱩᱣᱮᱥᱳᱱ ᱮ ᱥᱟ.ᱛ ᱠᱮᱫ ᱥᱚᱸᱜᱮ ᱜᱮ ᱟ.ᱢᱟ.ᱞᱤᱭᱟ. ᱯᱳᱥᱴ ᱯᱨᱳᱢᱳᱥᱚᱱ ᱞᱟ.ᱜᱤᱫ ᱰᱤᱯᱟᱨᱴᱢᱮᱱᱴᱟᱞ ᱵᱤᱱᱤᱰ ᱮ ᱚᱞ ᱠᱮᱜᱼᱟ ᱟᱨ ᱚᱱᱟᱨᱮ ᱡᱤᱛᱠᱟ.ᱨ ᱠᱟᱛᱮ ᱑᱙᱙᱖ ᱥᱟᱞᱮᱨᱮ ᱟ.ᱢᱟ.ᱞᱤᱭᱟ. ᱯᱳᱥᱴ ᱨᱮ ᱯᱨᱳᱢᱳᱥᱚᱱ ᱮ ᱧᱟᱢ ᱠᱮᱫᱼᱟ ᱾ ᱟᱨ ᱤᱱᱟ. ᱥᱮᱨᱢᱟ ᱜᱮ ᱟᱡᱤᱡ ᱛᱮᱥᱟᱨ ᱟᱨᱵᱟᱝ ᱦᱩᱰᱤᱧ ᱩᱛᱟ.ᱨᱤᱡ ᱠᱩᱲᱤ ᱜᱤᱫᱽᱨᱟ. ᱦᱟᱜ ᱡᱟᱱᱟᱢ ᱦᱩᱭ ᱮᱱᱟ ᱾

ᱟᱡ ᱫᱚ ᱥᱩᱢᱩᱝ ᱑᱔ ᱥᱮᱨᱢᱟ ᱵᱚᱭᱚᱥ ᱮ ᱛᱟᱦᱮᱸ ᱠᱟᱱ ᱡᱚᱦᱚᱜ ᱟᱨ ᱤᱨᱟ.ᱞ ᱪᱟᱱᱚᱪ ᱮ ᱚᱞᱚᱜ ᱠᱟᱱ ᱡᱚᱦᱚᱜ ᱢᱟ.ᱱ ᱦᱚᱨᱤᱯᱚᱫᱚ ᱢᱩᱨᱢᱩ ᱴᱷᱮᱱ ᱠᱚ ᱜᱚᱝ ᱠᱟᱫᱮᱭᱟ ᱾ ᱡᱟᱶᱟᱭ ᱚᱲᱟᱜ ᱟ.ᱛᱩ ᱧᱩᱛᱩᱢ ᱫᱚ ᱵᱟᱨᱫᱤ ᱠᱟᱱᱯᱩᱨ, ᱯᱩᱞᱤᱥ ᱥᱴᱮᱥᱳᱱ ᱼ ᱪᱟ.ᱠᱩᱲᱤᱭᱟ., ᱦᱚᱱᱚᱛ ᱼ ᱥᱤᱝᱵᱷᱩᱢ, ᱵᱤᱦᱟᱨ ᱯᱚᱱᱚᱛ ᱾ ᱱᱤᱛᱚᱜ ᱫᱚ ᱦᱚᱱᱚᱛ ᱼ ᱥᱟᱢᱟᱝ ᱥᱤᱝᱵᱷᱩᱢ, ᱡᱷᱟᱨᱠᱷᱚᱸᱰ ᱾ ᱟᱡᱤᱡ ᱡᱤᱛᱟ. ᱫᱚ ᱢᱤᱫ ᱥᱮᱨᱮᱧ ᱨᱩᱥᱤᱠᱟᱭ ᱛᱟᱦᱮᱸ ᱠᱟᱱᱟ ᱾ ᱯᱟ.ᱥᱤᱞ ᱫᱚ All India Radio ᱠᱚᱞᱠᱟᱛᱟ ᱠᱷᱚᱱ ᱥᱟᱱᱛᱟᱲᱤ ᱟᱠᱷᱲᱟ ᱮᱛᱚᱦᱚᱵ ᱛᱟᱨᱟ ᱠᱷᱚᱱ ᱟᱡᱟᱜ ᱥᱮᱨᱮᱧ ᱠᱚ ᱩᱪᱷᱟ.ᱱᱚᱜ ᱠᱟᱱ ᱛᱟᱦᱮᱸᱫ ᱑᱙᱙᱐ ᱥᱟᱞᱮ ᱫᱷᱟ.ᱵᱤᱫ ᱾ ᱟᱡ ᱨᱤᱱ ᱫᱚ ᱯᱮ ᱦᱚᱲ ᱦᱚᱯᱚᱱ ᱮᱨᱟ ᱢᱮᱱᱟᱜ ᱠᱚᱣᱟ ᱾ ᱯᱩᱭᱞᱩ ᱟᱨᱵᱟᱝ ᱢᱟᱨᱟᱝ ᱦᱚᱯᱚᱱ ᱮᱨᱟ ᱦᱟᱜ ᱧᱩᱛᱩᱢ ᱫᱚ ᱚᱨᱪᱚᱱᱟ, ᱫᱚᱥᱟᱨ ᱦᱚᱯᱚᱱ ᱮᱨᱟᱦᱟᱜ ᱧᱩᱛᱩᱢ ᱫᱚ ᱵᱚᱱᱫᱚᱱᱟ ᱟᱨ ᱛᱮᱥᱟᱨ ᱟᱨᱵᱟᱝ ᱦᱩᱰᱤᱧ ᱩᱛᱟ.ᱨᱤᱡ ᱦᱚᱯᱚᱱ ᱮᱨᱟ ᱦᱟᱜ ᱧᱩᱛᱩᱢ ᱫᱚ ᱯᱩᱱᱟ.ᱢ ᱾

ᱜᱤᱫᱽᱨᱟ. ᱩᱢᱮᱨ ᱠᱷᱚᱱ ᱜᱮ ᱥᱟᱶᱦᱮᱫ ᱪᱮᱛᱟᱱ ᱨᱮ ᱨᱟ.ᱥᱠᱟ. ᱫᱚ ᱢᱮᱱᱟᱜ ᱛᱟᱭᱟ ᱾ ᱟᱡᱟᱜ ᱚᱞ ᱚᱱᱚᱬᱦᱮ, ᱚᱱᱚᱞ, ᱠᱟ.ᱦᱱᱤ ᱠᱚᱫᱚ ᱟ.ᱰᱤ ᱜᱚᱴᱟᱝ ᱯᱟᱛᱷᱟᱢ ᱠᱚᱨᱮ ᱪᱷᱟᱯᱟ ᱯᱟᱨᱥᱟᱞ ᱟᱠᱟᱱᱟ ᱾ ᱡᱮᱞᱮᱠᱟ :-ᱥᱤᱞᱤ, ᱛᱮᱛᱨᱮ, ᱥᱟ.ᱨᱤ, ᱫᱤᱥᱟ., ᱦᱚᱞᱚᱝ ᱜᱟᱰᱟ, ᱠᱟᱨᱟᱢ ᱰᱟ.ᱨ, ᱮᱵᱷᱮᱱ ᱥᱟᱠᱣᱟ, ᱯᱚᱥᱪᱤᱢ ᱵᱟᱸᱜᱽᱞᱟ, ᱯᱟᱸᱡᱟ, ᱥᱟᱸᱫᱮᱥ, ᱡᱤᱣᱤ, ᱢᱟᱱᱛᱟᱨ, ᱡᱩᱜᱽ ᱥᱤᱨᱤᱡᱚᱞ ᱾ ᱟᱨ ᱦᱤᱱᱫᱤ ᱯᱟ.ᱨᱥᱤ ᱛᱮᱭᱟᱜ ᱚᱞ ᱠᱚᱫᱚ ᱡᱷᱟᱨᱠᱷᱚᱸᱰ ᱯᱨᱚᱫᱤᱯ, ᱟ.ᱝᱠᱩᱨ, ᱱᱚᱜᱚᱨᱯᱨᱚᱵᱷᱟ, ᱥᱚᱸᱵᱚᱫᱤᱭᱟ, ᱥᱚᱢᱠᱟᱞᱤᱱ ᱵᱷᱟᱨᱚᱛᱤᱭᱚ ᱥᱟᱦᱤᱛᱭᱚ, ᱟᱠᱟᱝᱥᱟ ᱮᱢᱟᱱ ᱯᱟᱛᱷᱟᱢ ᱠᱚᱨᱮ ᱪᱷᱟᱯᱟ ᱥᱚᱫᱚᱨ ᱟᱠᱟᱱᱟ ᱾ ᱚᱱᱟ ᱥᱟᱶᱛᱮ ᱱᱤᱛᱚᱜ ᱫᱷᱟ.ᱵᱤᱡ ᱛᱮ ᱢᱚᱬᱮ ᱜᱚᱴᱟᱝ ᱯᱩᱛᱷᱤᱭ ᱪᱷᱟᱯᱟ ᱦᱩᱭ ᱟᱠᱟᱜᱼᱟ ᱟᱨ ᱢᱤᱫ ᱛᱚᱨᱡᱚᱢᱟ ᱯᱩᱛᱷᱤ ᱫᱚ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱱᱟᱣᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ ᱪᱷᱟᱯᱟ ᱥᱚᱫᱚᱨ ᱟᱠᱟᱱᱟ ᱾

ᱫᱩᱨᱫᱚᱨᱥᱚᱱ ᱠᱮᱸᱫᱽᱨᱚ ᱠᱚᱞᱠᱟᱛᱟ ᱟᱨ ᱟᱠᱟᱥᱵᱟᱬᱤ ᱠᱚᱞᱠᱟᱛᱟ ᱠᱷᱚᱱ ᱦᱚᱸ ᱛᱷᱩᱛᱤ, ᱜᱟᱞᱢᱟᱨᱟᱣ, ᱟᱨ ᱚᱱᱚᱬᱦᱮ ᱠᱚ ᱦᱚᱸ ᱩᱪᱷᱟ.ᱱᱚᱜ ᱠᱟᱱ ᱛᱟᱭᱟ ᱾ ᱟᱨ ᱦᱚᱸ ᱵᱤᱨᱫᱟ.ᱜᱟᱲ ᱠᱚᱨᱮ ᱯᱟᱲᱦᱟᱣᱜ ᱠᱟᱱ ᱥᱤᱞᱟᱵᱟᱥ ᱯᱩᱛᱷᱤ ᱠᱚᱨᱮ ᱦᱚᱸ ᱢᱤᱫ ᱵᱟᱨ ᱥᱟᱛᱟᱢ ᱥᱮᱞᱮᱫ ᱢᱮᱱᱟᱜ ᱛᱟᱭᱟ ᱾

ᱢᱟ.ᱱᱤᱡ ᱭᱚᱥᱳᱫᱟ ᱢᱩᱨᱢᱩ ᱫᱚ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱱᱟᱣᱟ ᱫᱤᱞᱞᱤ ᱥᱟᱱᱛᱟᱲᱤ ᱮᱰᱵᱟᱭᱤᱡᱚᱨᱤ ᱵᱚᱨᱰ ᱨᱤᱱᱤᱡ ᱨᱟ.ᱥᱤᱭᱟ. ᱞᱮᱠᱟᱛᱮ ᱒᱐᱐᱘-᱒᱐᱑᱒, ᱫᱩᱨᱫᱚᱨᱥᱚᱱ ᱠᱮᱸᱫᱽᱨᱚ ᱠᱚᱞᱠᱟᱛᱟ ᱟᱨ ᱟᱠᱟᱥᱵᱟᱬᱤ ᱠᱚᱞᱠᱟᱛᱟ ᱨᱤᱱᱤᱡ ᱦᱚᱸ ᱡᱚᱭᱮᱸᱴ ᱯᱨᱚᱜᱨᱟᱢ ᱮᱰᱵᱟᱭᱤᱡᱚᱨᱤ ᱠᱩᱢᱩᱴ ᱨᱮ ᱨᱟ.ᱥᱭᱟ. ᱞᱮᱠᱟᱛᱮ ᱒᱐᱑᱑-᱒᱐᱑᱓ ᱟᱨ ᱦᱚᱸ ᱥᱟᱱᱛᱟᱲᱤ ᱮᱠᱟᱰᱮᱢᱤ ᱯᱩᱪᱷᱤᱢ ᱵᱟᱸᱜᱽᱞᱟ ᱨᱤᱱᱤᱡ ᱦᱚᱸ ᱮᱛᱚᱦᱚᱵ ᱨᱮ ᱨᱟ.ᱥᱤᱭᱟ.ᱭ ᱛᱟᱦᱮᱸ ᱠᱟᱱᱟ ᱾ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟ. ᱜᱟᱶᱛᱟ ᱨᱤᱱᱤᱡ ᱦᱚᱸ ᱡᱤᱵᱚᱱ ᱵᱷᱩᱨ ᱥᱚᱦᱮᱛ ᱞᱮᱠᱟᱛᱮ ᱢᱮᱱᱟᱜ ᱟᱠᱟᱫᱮᱭᱟ ᱥᱟᱶᱛᱮ ᱱᱚᱣᱟ ᱜᱟᱶᱛᱟᱨᱮᱭᱟᱜ ᱥᱮᱱᱴᱨᱟᱞ ᱠᱚᱢᱤᱴᱤ ᱨᱮ᱒᱐᱑᱑ ᱠᱷᱚᱱ ᱒᱐᱑᱔ ᱫᱷᱟ.ᱵᱤᱡ ᱮ ᱠᱟ.ᱢᱤ ᱟᱠᱟᱫᱼᱟ ᱠᱚᱢᱤᱴᱤ ᱨᱟ.ᱥᱤᱭᱟ. ᱞᱮᱠᱟᱛᱮ ᱾ ᱱᱚᱝᱠᱟ ᱜᱮ ᱢᱟ.ᱱᱤᱡ ᱢᱩᱨᱢᱩ ᱫᱚ ᱞᱮᱛᱟᱲ ᱜᱮ ᱥᱟᱶᱦᱮᱫ ᱦᱟᱨᱟᱵᱩᱨᱩ ᱠᱟ.ᱢᱤ ᱨᱮ ᱪᱷᱩᱴᱟ.ᱣ ᱟᱠᱟ ᱢᱮᱱᱟᱭᱟ ᱾ ᱱᱤᱛᱚᱜ ᱫᱚ ᱵᱮᱸᱠ ᱢᱮᱱᱮᱡᱚᱨ ᱞᱮᱠᱟᱛᱮ ᱫᱤᱞᱤ ᱛᱮᱭ ᱯᱳᱥᱴᱤᱝ ᱟᱠᱟᱱᱟ ᱾

ᱭᱚᱥᱳᱫᱟ ᱢᱩᱨᱢᱩ ᱫᱚ ᱱᱤᱛᱚᱜ ᱫᱷᱟ.ᱵᱤᱡ ᱢᱚᱬᱮ ᱜᱚᱴᱟᱜ ᱯᱩᱛᱷᱤᱭ ᱯᱟᱨᱥᱟᱞ ᱦᱩᱭ ᱟᱠᱟᱫᱼᱟ ᱾ ᱚᱱᱟ ᱯᱩᱛᱷᱤ ᱨᱮᱭᱟᱜ ᱧᱩᱛᱩᱢ ᱠᱚᱫᱚ ᱦᱩᱭᱩᱜ ᱠᱟᱱᱟ ᱺ-

• ᱑. ᱛᱳᱣᱟ ᱫᱟᱨᱮ ᱼ ᱒᱐᱐᱙

• ᱒. ᱥᱟᱶᱦᱮᱫ ᱰᱟ.ᱨ - ᱒᱐᱑᱐

• ᱓. ᱜᱩᱲ ᱢᱮᱥᱟ ᱜᱚᱲᱚᱢ ᱨᱟᱥᱟ ᱼ ᱒᱐᱑᱔

• ᱔. ᱠᱟᱸᱛ ᱨᱮ ᱡᱷᱚᱨᱠᱟ ᱛᱟᱦᱮᱸ ᱠᱟᱱᱟ - ᱒᱐᱑᱕ (ᱛᱚᱨᱡᱚᱢᱟ ᱯᱩᱛᱷᱤ ᱦᱤᱱᱫᱤ ᱜᱟᱢᱟᱢ ᱼ ᱫᱤᱵᱟᱨ ᱢᱮ ᱮᱠ ᱠᱷᱤᱰᱠᱤ ᱨᱮᱦᱛᱤ ᱛᱷᱤ) ᱥᱟᱦᱤᱛᱭᱚ ᱮᱠᱟᱰᱮᱢᱤ ᱠᱷᱚᱱ ᱥᱤᱨᱯᱷᱟ. ᱟᱢᱮᱴ ᱟᱠᱟᱫ ᱦᱤᱱᱫᱤ ᱯᱩᱛᱷᱤ ᱾

• ᱕. ᱥᱤᱫᱽ ᱦᱟᱞᱟᱝ ᱜᱟᱞᱟᱝ ᱢᱟᱞᱟ ᱼ ᱒᱐᱑᱗

ᱱᱤᱭᱟ. ᱛᱟᱭᱱᱚᱢ ᱟᱨ ᱦᱚᱸ ᱟᱭᱢᱟ ᱯᱩᱛᱷᱤ ᱠᱚ ᱪᱷᱟᱯᱟ ᱥᱚᱫᱚᱨ ᱨᱮᱭᱟᱜ ᱢᱮᱱᱟᱜᱼᱟ ᱾ᱪᱷᱟᱯᱟ ᱥᱚᱫᱚᱨ ᱞᱟ.ᱜᱤᱫ ᱥᱟᱯᱲᱟᱣ ᱨᱮ ᱢᱮᱱᱟᱜ ᱵᱟᱨᱭᱟ ᱯᱩᱛᱷᱤ ᱢᱤᱫ ᱫᱚ ᱠᱟ.ᱦᱱᱤ ᱠᱟᱱᱟ ᱟᱨ ᱫᱚᱥᱟᱨ ᱫᱚ ᱛᱚᱨᱡᱚᱢᱟ ᱯᱩᱛᱷᱤ ᱠᱟᱱᱟ ᱾

ᱭᱚᱥᱳᱫᱟ ᱢᱩᱨᱢᱩ ᱫᱚ ᱥᱟᱶᱦᱮᱫ ᱞᱟ.ᱜᱤᱫ ᱟᱡᱟᱜ ᱜᱟᱺᱦᱤᱨ ᱫᱩᱞᱟ.ᱲ ᱟᱨ ᱥᱚᱨᱮᱥ ᱠᱟ.ᱢᱤ ᱞᱟ.ᱜᱤᱫ ᱛᱤᱱᱟ.ᱝ ᱜᱟᱱ ᱥᱤᱨᱯᱷᱟ. ᱛᱮ ᱦᱚᱸᱭ ᱢᱟ.ᱱ ᱦᱟᱞᱟᱝ ᱟᱠᱟᱱᱟ ᱾ ᱚᱱᱟ ᱠᱚᱫᱚ ᱦᱩᱭᱩᱜ ᱠᱟᱱᱟ :-

• ᱑. ᱰᱨ. ᱟᱢᱵᱮᱫᱽᱠᱚᱨ ᱯᱷᱮᱞᱚᱥᱤᱯ ᱱᱮᱥᱱᱟᱞ ᱥᱤᱨᱯᱷᱟ.ᱼᱼᱼ ᱒᱐᱐᱙ ᱥᱟᱞᱮ ᱨᱮ, ᱵᱷᱟᱨᱚᱛᱤᱭᱚ ᱫᱚᱞᱤᱛ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱫᱤᱞᱤ ᱯᱟᱦᱴᱟ ᱠᱷᱚᱱ ᱾

• ᱒. ᱢᱟ.ᱱ ᱥᱟᱠᱟᱢᱼᱼᱼ ᱪᱮᱱᱱᱟᱭ ᱥᱟᱱᱛᱟᱲ ᱮᱥᱚᱥᱤᱭᱮᱥᱚᱱ, ᱪᱮᱱᱱᱟᱭ ᱯᱟᱦᱴᱟ ᱠᱷᱚᱱ ᱒᱐᱑᱓ ᱥᱟᱞᱮ ᱨᱮ ᱾

• ᱓. ᱥᱟᱨᱚᱫᱟ ᱯᱨᱚᱥᱟᱫᱽ ᱠᱩᱥᱠᱩ ᱥᱤᱨᱯᱷᱟ.---- ᱒᱐᱑᱗ ᱥᱟᱞᱮ ᱨᱮ, ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟ. ᱜᱟᱶᱛᱟ ᱯᱟᱦᱴᱟ ᱠᱷᱚᱱ ᱾

1. ↑ http://www.allindiaaseca.org/books/yashoda-murmu.html
2. ↑ https://www.prabhatkhabar.com/news/jamshedpur/story/1077339.html