William Maheia

William Maheia (Wil Maheia; * 12. April 1961 in Forest Home) is en Ümweltaktivist un Politiker ut Belize (NBA, PNP, BPP).

Maheia is 1961 in Forest Home boren. He weer op de Forest Home Methodist School un op de Punta Gorda Methodist School in Punta Gorda. In’n Dezember 1992 hett he en Bachelor of Arts in Environmental Studies an de Northeastern Illinois University maakt un 1995 en Master of Sciences an de University of Idaho (Hööftfach Natural Resources, Recreation and Tourism).

Na dat Studium in de USA keem Maheia na Belize trügg un hett dor as Manager för dat Belize Center for Environmental Studies (BCES) arbeidt. Nadem dat BCES 1997 dichtmaken müss, hett Maheia dat Toledo Institute for Development and Environment (TIDE) grünnt un weer bet 2006 ok Direkter von dat TIDE.

Een wichtig Thema för em is de Grenzkunflikt twüschen Belize un Guatemala. Maheia is Grünner von de Belize Territorial Volunteers (BTV), en Grupp von Freewillige ut Belize, de de Butengrenzen von dat Land överwaken doot.

Maheia weer Parteibaas von de People’s National Party (PNP). Düsse Partei is 2007 en Allianz mit annere Partein ingahn, de so de National Belizean Alliance (NBA) billt hebbt. Maheia is ok Baas von de NBA worrn.

Bi de Parlamentswahl in Belize 2008 is Maheia för de PNP in’n Wahlkreis Toledo Oost antreden. He hett 6,78 % von de Stimmen kregen un hett dormit gegen Peter Eden Martinez von de UDP un Michael Espat von de PUP verloren. Bi de Wahl 2012 is he in’n sülven Wahlkreis wedder PNP-Kannedaat ween un hett 5,83 % von de Stimmen haalt. Dormit hett he wedder gegen Michael Espat (PUP) un Peter Eden Martinez (UDP) verloren.

To de Wahl 2015 is Maheia för de Belize Progressive Party (BPP) antreden, de sik kort vörher ut PNP un annere lüttjere Partein billt harr. In de BPP weer Maheia Viez-Parteibaas. He weer wedder Kannedaat in’n Wahlkreis Toledo Oost un hett 4,12 % von de Stimmen kregen. Aver ok düt Maal harrn Espat un Martinez düüdlich mehr Stimmen.

Bi de Wahl 2020 is Maheia nich mehr in’n Distrikt Toledo, man in Belize-Stadt in’n Wahlkreis Fort George antreden. He hett 2,21 % von de Stimmen haalt un dormit gegen Henry Charles Usher von de PUP un Melvin Hewlett von de UDP verloren.

Maheia is verheiraadt. He un siene Fro Ellen hebbt een Söhn un een Dochter. Maheia leevt in Punta Gorda un is privaat Bedriever von de Bar Waluco in de Stadt.

1. ↑ Biografie bi de BPP