Walter Jung

Dr Walter Jung (* 6. April 1923 z Löörech; † 2004) isch e dytsche Beamte un Haimetautor gsii.

Dr Walter Jung isch e Suhn vun eme Beck gsii un Brueder vum CDU-Bundesdagsabgordnete Wilhelm Jung. Anne 1938 isch er as Lehrbue in Dienscht vu dr Stadt Löörech drätte un het do iiber 40 Johr lang gschafft. Im Zweete Wältchrieg isch er mit 19 Johr as Soldat z Russland gsii. Anne 1963 isch er Rotsschryber woore un dodermit Laiter vum domolige Hauptamt, ainewäg het er si nie sälber „Hauptamtslaiter“ welle nänne. Är het si in dr Dradizion vu dr badische Rotsschryber gsää, wu au im Amt Mänsch blibe sin un loyal zum oberschte Dienschtherr gsii sin, in syre Zyt langi Johr dr OB Egon Hugenschmidt. Är het nit nume s Hauptamt mit syne Abdailige glaitet, dodrunter Personal un Kultur, är het au Fescht un Veraastaltige organisiert un isch fir d Effetligkaitsarbet zueständig gsii. Anne 1987 isch er in Ruestand gange.

Dr Jung het langi Johr zue dr Gschicht vu dr Stadt Löörech un vu dr Region gforscht un doderzue Ufsätz in Fachzytschriftte un Artikel in Zytige publiziert un au in Feschtschrifte fir Verains-, Pfarrei- un Firmenjubiläum. Zäme mit em Gerhard Moehring het er 25 Bänd vum Johrbuech „Unser Lörrach“ uuegee.

As „Müpfi“ het er im Oberbadische Volksblatt ab 1956 bis zue sym Dod di alemannisch Kolumne „Zwüsche Dülliger un Güggel“ gschribe. Där Name het er us em Gedicht „Müpfi. der Prophet“ gnuu, wu dr Hermann Burte anne 1908 gschribe ghaa het. Wun er mit däre Kolumne anne 1964 ufghert het un gschribe het, s sei jetz „gnueg Heu dunte un e Jüngere soll witerschriibe“, hän d Läser lut proteschtiert un ab 1968 het er schließli wytergschribe mit dr Wort „Der neu Müpfl will nit Sproochrohr si für anderi. Er will sälber schwätze und schriibe [...] un er will dem Wunsch vo sine Läser, ab un zue wieder emol öbbis Alemannisches in der Heimetzyttig z‘seh, gern entgegecho. Meh nit.“ Zum 100-jehrige Juibleum vum Oberbadische Volksblatt het dr Schurnalischt Oskar Jung iber dr „Müpfi“ gschribe:

Dernäbe het si dr Jung au ehrenamtlig engaschiert. Är isch Vizebresidänt vum Hebelbund gsii un Schriftfierer bim Museumverain un Verwaltigsrotysmitglid bi dr Stadtmusik.

Anne 1989 het er s Bundesverdienchtchryz iberchuu un 1975 dr Hebeldank vum Löörecher Hebelbund.

Är isch ghyrote gsii mit dr Ingeborg Jung geb. Schwärzel un het mit ire ne Dochter ghaa. Är isch vergrabe uf em Hauptfridhof z Löörech.

• Autoren aus dem Dreiländereck. In: Alemannisch dunkt üs guet I/II 2000, S. 40–41
• Nikolaus Trenz: Aus Liebe zu seiner Heimatstadt und ihren Menschen, Badische Zeitung, 2. Juli 2004
• Sabine Ehrentreich: Walter Jung: Chronist und Gedächtnis der Stadt, Badische Zeitung, 10. Novämber 2006
• Guido Neidinger: Zum Tode von Walter Jung. 1923-2004. Den Müpfi kann es nicht mehr geben, In: Das Markgräflerland. Beiträge zu seiner Geschichte und Kultur. Geschichtsverein Markgräflerland, Schopfheim 66.004, Heft 2.2004, S. 161-162