V. A. Selevin

Виктор Алексеевич Селевин (5.4.1905, Ресей, Алтай өлкесі, Змеиногорск қаласы — 4.11.1938, Алматы) — зоолог-ғалым, өлкетанушы. Орта Азия мемлекеттік университетін (1932) және оның аспирантурасын (1935) бітірген. 1935 — 38 ж. КСРО Ғылым Академиясының Қазақстандық базасының зоология секторында ғылыми қызметкер болды. Селевиннің негізгі ғылыми еңбектері фаунистика, Қазақстандағы кәсіби мақсатпен ауланатын аңдарды қорғау және пайдалану мәселелеріне арналған. Селевин Орталық Қазақстанға жіберілген экспедицияларды басқарып, Бетпақдала сүтқоректілерінің түрлерін, жіктелімін зерттеді, кемірушілердің ғылымға беймәлім түрі — жалман тышқанын тауып, оған сипаттама берді.