Ulrich Farrenkopf

Ulrich Farrenkopf (naskiĝis la 22-an de februaro 1975 en Miltenberg) estas germana esperantisto. En la 1990-aj kaj 2000-aj jaroj li okupiĝis pri eksteraj rilatoj de Germana Esperanto-Junularo (partatempe ankaŭ kiel estrarano). Li ekde tiam ofte estas la reprezentanto de GEJ en la asembleo de la asocio Deutscher Bundesjugendring (DBJR), la Germana Federacia Junulara Ligo.

Ekde 2000 li reprezente de GEJ kaj DBJR prijuĝas ĉe la institucio "Freiwillige Selbstkontrolle der Filmwirtschaft" (FSK, libervola memkontrolo de la filma industrio), ĉu filmoj povus endanĝerigi la psikan sanon de infanoj kaj sekve estus blokendaj de junaj aĝgrupoj.

Post dek lernejaj jaroj en Miltenberg, li abiturientiĝis inter la jaroj 1991 kaj 1994 en internulejo de la katolika gimnazio Vinzenz-Pallotti-Kolleg de Rheinbach. De 1994 ĝis 2002 li studis en la bonna universitato kaj sekve de tio doktoriĝis pri la korsika lingvo. Paralele li plustudis en Speyer kaj Bochum. Post la doktoriĝo li komencis edukiĝon kiel nekuracista psikoterapiisto de infanoj kaj adoleskuloj.