Quick Facts
Biography
Tofiq Əliheydər oğlu Allahverdiyev — dövlət xadimi.
Həyatı
1917-ci ildə həkim ailəsində anadan olmuşdur, azərbaycanlıdır, 1939-cü ildən Sov.İKP üzvüdür, ali təhsili var – Azərbaycan Neft İnstitutunu, Neft Sənayesi Akademiyasını və Sov.İKP MK yanında Qiyabi Ali Partiya Məktəbini bitirmişdir. Texnika elmləri namizədi, dosentdir.
1938-ci ildən Komsomol işində çalışmışdır, Böyük Vətən müharibəsinin iştirakçısıdır. 1943-1952-ci illərdə Azərbaycan LKGİ MK katibi olmuş, diplomatik işdə çalışmış, Azərbaycan KP MK şöbə müdirinin müavini, şöbə müdiri, AHİŞ sədri, Azərbaycan KP MK katibi, Gəncə Vilayət Partiya Komitəsinin katibi vəzifələrində işləmişdir. 1953-cü ildən neft mədəninin müdiri, akademiya müdavimi olmuşdur. 1955-1961-ci illərdə Bakı Şəhər Partiya Komitəsinin birinci katibi, 1961-1966-cı illərdə M. Əzizbəyov adına Neft və Kimya İnstitutunun dosenti olmuşdur. 1966-cı ilin mart ayından Azərbaycan SSR Nazirlər Soveti Dövlət Texniki Peşə Təhsili Komitəsinin sədridir.
Azərbaycan KP MK üzvlüyünə namizəddir. Üçüncü və beşinci çağırış SSRİ Ali Sovetinə, üçüncü, yeddinci, səkkizinci və doqquzuncu çağırış Azərbaycan SSR Ali Sovetinə deputat seçilmişdir (Neftçala seçki dairəsi).
1982-ci ildə vəfat edib.
Fəaliyyətı
Texnika elmləri namizədi, dosent Tofiq Allahverdiyev 1966-cı ildə Azərbaycan Dövlət Texniki Peşə Təhsili Komitəsinin sədri təyin olunub. 1982-ci ilə qədər bu vəzifədə çalışıb. Onun sədr işlədiyi dövrdə texniki peşə məktəblərinin sayı 1,7 dəfə, şagirdlərin sayı 2 dəfə artmışdı. 1966-1970-ci illərdə bu məktəblərdə 96,4 min ixtisaslı fəhlə hazırlanıb.
Təkcə 1970-ci ildə Azərbaycanda fəaliyyət göstərən 76 texniki peşə məktəbində 150 peşə üzrə 40,9 min şagird təhsil alıb. Texniki peşə məktəblərində 594 kabinet, 100 laboratoriya, 285 tədris emalatxanası təşkil edilib. Həmin dövrdə kənd texniki peşə məktəblərində 335 traktor, 93 taxılbiçən kombayn, 28 pambıqyığan maşın, 430 ədəd müxtəlif kənd təsərrüfatı maşını olub.