Theo Candinas

Theo Candinas (* 19 da december 1929 a Surrein, vischnaunca da Sumvitg) ei in scribent e schurnalist romontsch.

Theo Candinas ei fegl d'in pur e scolast. El ei naschius ils 19 da december 1929 a Surrein. Suenter la patenta da scolast primar ha el fatg studis alla universitad da Friburg, Paris e Perugia ed ha instruiu denter auter treis decennis e miez alla scola secundara ed alla scola mercantila per giuvnas dil marcau da Cuera. Dapi 1991 viva el a Surrein ed el Tessin sco scribent e schurnalist. En siu engaschament public cultural eis el staus denter auter redactur dalla Talina, dallas Novas litteraras dils scribents romontschs, da Welt im Wort dall'uniun dils scribents svizzers, suprastont e president dall'Uniun da scripturas e scripturs romontschs, suprastont e vicepresident dalla Ligia Romontscha, president dil cussegl da scola dil Seminari da mussadras romontschas e scolast da romontsch en quei Seminari.

Theo Candinas ha entschiet a scriver poesias gia sco scolar dalla scola primara e secundara. Sia vasta ovra litterara publicada cumpeglia ils geners da prosa, lirica, dramatica, cabaret, giugs auditivs ed in libret per in film. En numerus referats, en lecziuns e prelecziuns en ed ord la Svizra ha Theo Candinas purtau il messadi da nies lungatg e da nossa cultura ed ei vegnius undraus denter auter duas gadas cun in premi da reconuschientscha dalla Fundaziun svizra Schiller, cun in premi da reconuschientscha culturala dil cantun Grischun e sco commember d'honur dalla Romania.

• Maria Madleina
• Historias da Gion Barlac
• Historias dil Parler Pign ed autras bialas
• Tè-Tuà
• Il barun dalla Muota

• Deplazes G., Funtaunas, Istorgia da la litteratura rumantscha per scola e pievel, tom 4, Lia rumantscha, Cuira, 1993

• Theo Candinas en il Lexicon istoric retic
• Theo Candinas en il Lexicon da teater svizzer
• Pagina d'internet da Theo Candinas