Sergio Berardo

Sèrgi Berardo (mai conegut jos la forma italiana Sergio Berardo; Turin, 1958) es un cantaire occitan, menaire del grop Lo Dalfin de las Valadas Occitanas.

Sèrgi Berardo nasquèt a Turin, vila de son paire mentre que sa maire es originària d'un vilatge de las Valadas Occitanas, Caralh. Dins son jovent passèt fòrça temps entre Caralh e Turin, entre montanha e val, vilatge e vila. Foguèt entre sos quinze e setze ans que comencèt de s'interessar a la musica. Al meteis moment coneguèt l'ideològ occitan Francés Fontan e s'interessèt vivament a las reivindicacions occitanistas. Tre aquel moment sa carrièra s'orientèt dins aquesta direccion dobla: la musica e l'occitanisme. En 1982 amb qualques amics creèt un grop lo Bachàs, puèi la Chaparossa, una formacion de musica piemontesa entre 1987 e 1990. Foguèt finalament en 1991 que faguèt espelir Lo Dalfin, la formacion musicala mai coneguda per la cultura occitana de las Valadas.