Rufo Wever

Rufo Wever tawata un compositor y musico di Aruba. El a compone: tumba, bolero, zamba, mambo, porro, merengue, danza, mazurka, polka y calypso.

Dia ocho di December 1917, Rufo Inocencio Wever a nace na Wilhelminastraat 33, Oranjestad, Aruba, e primogenito di e matrimonio di Shon Leonila Maria Annette Lampe Babijn y Civiles Marcial Wever Everts.

E pareha tabata bin di famianan acomoda y Civiles Wever tabata un contratista, constructor di edificionan, di barconan y ebanista.

Don Civiles Wever tabata tin un mente technico pero tambe tabata gusta musica y tabata toca clarinet y cuarta.

Net prome cu Rufo Wevera cumpli 6 aña, Rufo a haña un simfonia di boca regalo y den un par di dia ela sorprende su famia cu e por a toca un cantica cu tabata na moda su mes y sin ningun ayudo. Rufo su tata a keda masha impresiona y entusiasma y mesora a cumpra un piano y a contrata e conocido maestra di musica di Corsow, Shon Shishi Rodriguez Timmer pa Rufo. Sra. Rodriguez a cuminsa siña Rufo e conocimentonan di musica en general. Manera cu Rufo a haña e piano e mes tabata practica ariba dje.

Tempo cu Rufo Wever ta tin apenas 10 aña su tata a fallece arrepentinamente y a laga Rufo y su tres otro rumannan huerfano. Su mama Shon Annette, un dama di karakter fuerte y semper [1]cu un conducta correcto a sigui e lucha pa hiba su famia padilanti. Aki ela haña e sosten financiero di su famia.

Tempo cu Rufo ta tin 12 aña ya e por a toca piano na un manera admirable. Tambe ela sinja su mes saxofoon, guitara, cuarta, clarinet y otro instrumentonan ritmico.

Tempo cu Rufo ta tin 15 aña ela lanta e orkesta musical “Melody Band” hunto cu su amigonan : Tom Lampe ( violin ) , Wewe Croes ( violin), Boysie Lampe ( violin ),  Twai Croes ( trompet), Clemente Lacle ( drum ), y Rufo na piano. Despues tambe a join e grupo Padu Lampe, primo segundo di Rufo, y aki a cuminsa nan amistad.

Nan 1935, Rufo Wever, inspira door di e famoso compositor y cantante Argentino Carlos Gardel cu a bishita Aruba e aña ei, y cu Rufo a hanja un oportunidad pa actua hunto cu ne,  Rufo a lanta su grupo di tango “ Los Trovadores Tropicales” hunto cu su amigonan Clemente Lacle ( cantante ) y guitaristanan : Harold Hopmans, Carlos Booi, Jan Croes y Shemmi Coronel. E conjunto aki tabata e prome conjunto musical di Aruba cu a toca na un radio na Corsow, radio Curom.

[1]

INICIO COMO COMPOSITOR

Aña 1935 tabata un aña di hopi significacion pa historia musical, Rufo Wever a compone na edad di 18 aña, su prome wals “ Arubanita” y e composicion aki a cuminsa e era di composicionnan Arubano moderno. E composicion aki a bira asina conoci y gusta cu te awe e ta sigui ta un di e composicionnan mas toca den historia musical di Aruba. Ela wordo toca y graba pa un variedad di artistanan y cu hopi frequencia por tende na radio y televishon. E tabata e prome wals, Arubano y Antiyano, cu un miembro di Cas Real, Reina Juliana, a balia riba dje.

E composicion di “Arubanita” tin su significacion historico y cultural pa Aruba, pasobra e ta e prome composicion cu su autor ta conoci y cu te ainda ta wordu graba y toca.

Despues di su prome composicion a sigui un sin fin di composicionnan refina y cu un sabor pikante. Entre otro e famoso wals di tres parti “Encantadora”, su segundo wals, e wals complejo “Annette” den tres parti dedica na su mama. E wals “Aruba”, bunita y elegante e ta representa e gran dignidad di e pueblo di Aruba. E wals “Antillenhuis” ela dedica na e minister Arubano y su gran amigo Wim F.M. Lampe.

Rufo Wever su amor pa su isla ta obvio ora ripara cuanto biaha ela usa e nomber Aruba : wals “Arubanita, wals “Aruba”, himno “Aruba Dushi Tera ”, tumba “Aruba tiera bunita”, ”mambo di Aruba”, wals “Mi Aruba Stima”.

Tambe tin composicion cu su gran amigo y colega Padu Lampe:

E tumba “Chanita” cu letra di Hubert Booi, e inmortal calypso “Carnaval” di aña 1954 cu a bira famoso cu e cantante Edwin Zichem y naturalmente e himno nacional di Aruba “Aruba Dushi Tera” composita na 1953 y graba pa prome bes den version di orkesta na Venezuela pa e orkesta di Don Anibal Abreu.

UN DON MUSICAL

Compone tabata facil pa Rufo y a sigui un total di mas of menos 450 composicion. Di esaki mas of menos 150 ta composicionnan completo pa piano of orkesta y 300 ta composicionnan y areglo pa cahi orgel.

Rufo su composicionnan ta inclui : wals, tumba, bolero, zamba, mambo, porro, merengue, danza, mazurka , polka y calypso. Tambe ta di importancia pa menciona cu ademas di compositor, Rufo tabata arreglista y tur e arreglonan e tabata hasi su mes.

Semper Rufo tabatin un of otro melodia den su cabez, pesei tabata wordu exigi di e muchanan di famia pa no hasi ningun ruido, pasobra esaki por causa  cu Rufo ta perde e melodia di e composicion cu e tabata bezig cu ne.

Den un entrevista sostene cu Rufo na 1968 ariba e pregunta cu di tur su composicionnan cual ta su favorito, e contesta tabata rapido: e wals “Encantadora”.

CAHI ORGEL

Na edad di 21 aña Rufo a cuminsa cu e trabou di cahi orgel. Aruba conoce awe na anja 2012 mas of menos 115 aña di musica di cahi orgel, pero Rufo tabata e prome persona cu a cuminsa traha e cylindernan pa e cahi orgel na Aruba y ela hasi esaki pa 33 aña. Anteriormente e cylindernan tabata bai Corsow. E hecho aki tambe ta duna Rufo Wever un lugar especial den historia di musica folklorico di Aruba. Pa hopi di e composicionnan cu Rufo a haci pa caha di orgel ela usa e number artistico A. N. Tillano. Den historia di musica di caha di orgel por waak e nomber aki ta aparece na hopi caminda y hopi hende no sa cu esaki ta Rufo mes.

ACCIDENTE Y PERSEVERANCIA

Na 1941 den un accidente fatal Rufo a perde su braza robez, apesar di e tragedia aki den su bida ela supera esaki y ela keda compone y toca piano cu un braza artificial cu e mes a diseña y cu a wordu traha pe na Alemania. Despues ela hanja cu esaki tabata pisa hopi pa e por toca piano cu ne y e mes a traha un na Aruba usando tasnan di cuero di scol cu no tabata wordu usa mas. Despues di a recupera Rufo a sigui cu su dedicacion total den musica.

Dia 30 di December 1977, apesar cu Rufo su salud a bai atras, toch ela fayece inespera di un pulmonia.

Aruba y Antiyas a perde un di su musiconan di mas grandi, e pionero di e musica y cultura moderno di Aruba.

Aruba Dushi Tera

Composicion

Wever a traha mas cu 400 composicion. Algun tambe bou di e nomber A.N. Tillano.

Na 1976 Aruba Dushi Tera un composicion di 1950 di Rufo Wever y Padu Lampe, a ser decreta como Himno di Aruba na 1967 un couplet di Hubert Booi a wordo añadi na e himno. Na 1950 e himno Arubano a wordo componi pa Wever hunto cu Padu Lampe.

Na 1977 Rufo Wever a haya problema di salud. El a fayece dia 30 di december 1977 di un pulmonia. Nan a der'e riba un dialuna dia 2 di januari 1978 cu entiero musical.

Na 1975 e Mahestad a condecora Rufo Wever pa Ridder in de Orde van Nassau.

1. ↑ http://books.caribseek.com/Curacao/Muziek_en_Musici_Nederlandse_Antillen/rufo-inocencio-wever.shtml

• Video di Rufo Wever