Roland Burkhart

Dr Roland „Buki“ Burkhart(* 1946 z Fryburg) isch e dytsche Buechhändler un Liedermacher. Mer chännt en z Sidbade vor allem fir sy Engaschmänt un syni Lieder gege s blant AKW Wyhl.

Dr Burkhart isch im Fryburger St.-Elisabeth-Chrankehuus uf d Wält chuu. Är isch mit vier Gschwischter in ere Buurefamilie z Iechdinge am Chaiserstuel ufgwachse. Mit zwelf Johr isch er uf Fryburg an s Friedrich-Gimnasium chuu un het dert 1967 Abitur gmacht. In dr Schuelzyt het er im Studiehaim St. Georg gwohnt. No dr Schuel het er z Pfulladorf un z Semmerengea dr Wehrdienscht glaischtet. Scho in dr Schuel, aber vor allem in dr Zyt bi dr Bundeswehr isch er bolitisiert wore. Ab 1969 het er an dr Universitet Fryburg Bolitik un Soziology studiert. Är het noodrägli dr Chriegsdienscht verwaigeret, wu fimf Johr lang brucht het, bis es dure gsii isch. In dr Aafangsjohr vum Studium isch er als im Liberale Club gsii, wu d Fryurger Juged in däne Johr iber Bolitik dischpetiert het. In dr Johr 1974 un 1975, in dr Ändphase vum sym Studium, isch er aktiv gsii im Widerstand gege s blant Atomchraftwärch Wyhl. Är het aigeni Lieder im alemannische Dialäkt vum Chaiserstuel gschribe, wun er bi Demonschtratione un andere Broteschtveraastaltige gsunge het. Au noch em Studium het er Ändi 1970er Johr vyl Ufdritt as Liedermacher un Broteschtsänger ghaa. Anne 1982 het er unter em Pseudonym „Buki“ im Verlag Trikont/Unsere Stimme e Schallplatte mit Lieder unter em Titel „De bleede Ofe“ uusegee.

Bim JosFritz z Fryburg het er vu 1978 bis 1982 Buechhändler glehrt. Är isch dert zueständig gsii fir Ökobuech-Abdailig un fir d Schallplatte. In eme Interview mit em Stielinger-Magazin het er im Dezämber 2013 iber die Zyt gsait:

Mit eme aigene Buechservice het er si scho zum Dail sälbschtständig gmacht ghaa, ab 1989 het er si mit sym Buechversand ganz sälbschtständig gmacht. Dr Jos Fritz-Buechlade sei as linki Kaderschitti eso verschriie gsii, ass d Universität kai Biecher vun em het welle chaufe. Sy Biro het er syterhär in dr Stielingerstroß. Zum 1. Jänner 2018 het er sy Buechservice ufgee un an d Buechhandlig Edel ibergee.

Syt Ändi 1980 Johr wohnt er z Waldkilch. Är het zwee Sihn. Z Waldkilch engaschiert si dr Burkhart in dr Offene Liste (DOL), vu Jänner bis Juli 2009 isch er au mol Mitglid vum Waldkilcher Stadtrot gsii. Är isch aktiv im Georg-Scholz-Haus-Kunstforum (Vorstandsmitglid) un in dr Ideenwerkstatt Waldkirch. Är macht bi zwee Lääsekrais mit, aine isch z Pfaffewyler, ain in dr Fryburger Stadtbibliothek. Z Elzach het er e baar Johr lang e Lääsekrais fir Seniore glaitet. Är het au e Zytlang di Lang Nacht vu dr Märli im Elzdal mitorganisiert.

• De bleede Ofe. LP. Trikont/Unsere Stimme 1982.

• Websyte Burkhart Buchservice
• Roland Burkhart / Buki: Mensch, Buchhändler, Liedermacher, Aktivist. In: Stühlinger Magazin, Dezember 2013 (Online uf bund-rvso.de)
• Katja Rußhardt: Nai hämmer gsait. Badische Zeitung, 8. April 2018