Pramila Giri

ପ୍ରମିଳା ଗିରି (ଜନ୍ମ:୧ ଜାନୁଆରୀ ୧୯୫୭) ଜଣେ ଓଡ଼ିଆ ରାଜନୀତିଜ୍ଞ । ସେ ଓଡ଼ିଶା ରାଜନୀତିରେ ଭାରତୀୟ ଜନତା ପାର୍ଟିର କର୍ମକର୍ତ୍ତା ଭାବରେ ସକ୍ରିୟ ଅଛନ୍ତି । ପ୍ରମିଳା ୨୦୦୪ ମସିହାରେ ଓଡ଼ିଶା ବିଧାନ ସଭାକୁ ନିର୍ବାଚିତ ହୋଇଥିଲେ । ୨୦୦୪ ମସିହାର ଓଡ଼ିଶା ବିଧାନ ସଭା ନିର୍ବାଚନରେ ସେ ଭାରତୀୟ ଜନତା ପାର୍ଟିର ପ୍ରତିନିଧି ଭାବରେ ବୈସିଙ୍ଗା ବିଧାନ ସଭା ନିର୍ବାଚନ ମଣ୍ଡଳୀରୁ ୧୩ଶ ଓଡ଼ିଶା ବିଧାନ ସଭାକୁ ନିର୍ବାଚିତ ହୋଇଥିଲେ ।

ପ୍ରମିଳା ଗିରି ୧୯୫୭ ମସିହାର ଜାନୁଆରୀ ମାସ ୧ ତାରିଖରେ ଜନ୍ମଗ୍ରହଣ କରିଥିଲେ । ତାଙ୍କ ବାପାଙ୍କ ନାମ ଥିଲା ସୁଦର୍ଶନ କୁଆଁର । ସେ କଳାରେ ସ୍ନାତକ କରିଥିଲେ । ପ୍ରମିଳା ରସିକ ଚନ୍ଦ୍ର ଗିରିଙ୍କୁ ବିବାହ କରିଥିଲେ । ଏହି ଦମ୍ପତ୍ତିଙ୍କର ଦୁଇଟି ପୁଅ ଅଛନ୍ତି । ପ୍ରମିଳାଙ୍କ ପତି ଭାରତୀୟ ସେନାର ଜଣେ ଅଧିକାରୀ ଥିଲେ । ସେ ସମାଜ ସେବା କରିବା ପାଇଁ ପସନ୍ଦ କରନ୍ତି । ପ୍ରମିଳା ଓଡ଼ିଆ, ଇଂରାଜୀ, ହିନ୍ଦୀ, ବଙ୍ଗଳା, ଆସାମୀ ଓ ଗୁଜରାଟି ଭାଷା ଜାଣିଛନ୍ତି ।

ପ୍ରମିଳା ଓଡ଼ିଶା ରାଜନୀତିରେ ଭାରତୀୟ ଜନତା ପାର୍ଟିର ଜଣେ କର୍ମକର୍ତ୍ତା ଭାବରେ କାର୍ଯ୍ୟ କରୁଥିଲେ । ସେ ୨୦୦୪ ମସିହାରେ ଓଡ଼ିଶା ବିଧାନ ସଭାକୁ ନିର୍ବାଚିତ ହୋଇଥିଲେ । ୨୦୦୪ ମସିହାରେ ହୋଇଥିବା ଓଡ଼ିଶା ବିଧାନ ସଭା ନିର୍ବାଚନରେ ସେ ଭାରତୀୟ ଜନତା ପାର୍ଟିର ପ୍ରତିନିଧି ଭାବରେ ବୈସିଙ୍ଗା ବିଧାନ ସଭା ନିର୍ବାଚନ ମଣ୍ଡଳୀ ପାଇଁ ନିର୍ବାଚନ ଲଢ଼ିଥିଲେ । ଏହି ନିର୍ବାଚନରେ ଭାରତୀୟ ଜନତା ପାର୍ଟି ଏବଂ ବିଜୁ ଜନତା ଦଳ ସହମତିରେ ନିର୍ବାଚନ ଲଢ଼ିଥିଲେ । ଏହି ବିଧାନ ସଭା ନିର୍ବାଚରେ ସେ ବିଜୟୀ ହୋଇ ସେ ୧୩ଶ ଓଡ଼ିଶା ବିଧାନ ସଭାକୁ ନିର୍ବାଚିତ ହୋଇଥିଲେ । ଏହି ବିଧାନ ସଭାରେ ସେ ୨୦୦୪ ମସିହାରୁ ୨୦୦୯ ମସିହାର ବିଧାନ ସଭାର କାର୍ଯ୍ୟକାଳ ଶେଷ ହେବାଯାଏଁ ସେ କାର୍ଯ୍ୟ କରିଥିଲେ ।

ଏହି ବିଧାନ ସଭାରେ ପ୍ରମିଳା ଗୃହ ଆଦାୟ କମିଟି, ଗୃହ ମହିଳା ଓ ଶିଶୁ ବିକାଶ କଲ୍ୟାଣ ବିଭାଗ, ଗୃହ ସଦସ୍ୟମାନଙ୍କର ସୁବିଧା ସୁଯୋଗ ପାଇଁ ଗଠିତ କମିଟି, ହସ୍ତକଳା ଓ ହସ୍ତତନ୍ତ ବିଭାଗ ପାଇଁ ଗଠିତ କାର୍ଯ୍ୟକାରୀ କମିଟି, ଓଡ଼ିଶାର ଉତ୍ପାଦ ଶୁଳ୍କ ବିଲ, ୨୦୦୫ ଆଦିରେ ସେ ଜଣେ ସଦସ୍ୟ ଭାବରେ ୨୦୦୪ ମସିହାରୁ ୨୦୦୮ ମସିହାଯାଏଁ ବିଭିନ୍ନ ସମୟରେ କାର୍ଯ୍ୟ କରିଥିଲେ । ୨୦୦୯ ମସିହାରେ ପ୍ରମିଳା ଗିରି ଭାରତୀୟ ଜନତା ପାର୍ଟି ଛାଡ଼ି ବିଜୁ ଜନତା ଦଳରେ ଯୋଗ ଦେଇଥିଲେ ।

ପ୍ରମିଳା ମିଥ୍ୟା ପ୍ରାମଣପତ୍ର ଦେଇ ସଂରକ୍ଷିତ ଆସନରୁ ନିର୍ବାଚନ ଲଢ଼ି ବିଜୟୀ ହୋଇଥିଲେ ବୋଲି ଅଭିଯୋଗ ହୋଇଥିଲା । ୨୦୦୮ ମସିହାରେ ତାଙ୍କ ବିଷୟରେ ଅଭିଯୋଗ ହୋଇଥିବାରୁ ସେ ୨୦୧୨ ଗିରଫ ହୋଇଥିଲେ । ଗିରଫ ହେଲାବେଳକୁ ପ୍ରମିଳା ମୟୂରଭଞ୍ଜ ଜିଲ୍ଲା ବିଜୁ ଜନତା ଦଳର କାର୍ଯ୍ୟକାରୀ ସଭାପତି ଭାବରେ କାର୍ଯ୍ୟ କରୁଥିଲେ । ତାଙ୍କୁ ଭାରତୀୟ ସମ୍ବିଧାନର ଧାରା ୪୬୭, ୪୬୮, ୪୭୧ ଏବଂ ୪୨୦ରେ ଗିରଫ ହୋଇଥିଲେ । ପ୍ରମିଳାଙ୍କ ବିରୋଧରେ ବେତନଟୀ ବ୍ଲକ କଂଗ୍ରେସ ସଭାପତି ପ୍ରବୋଧ କୁମାର ପଣ୍ଡା ଏହି ଅଭିଯୋଗ ଆଣିଥିଲେ । ପ୍ରମିଳା ଜନ୍ମରୁ ଗୋପାଳ ଥିଲେ, ମାତ୍ର ବିବାହ ପରେ ତାଙ୍କ ପତିଙ୍କ ଅନୁସାରେ ସେ ଆଦିବାସୀ ପ୍ରମାଣପତ୍ର ଦେଇ ନିର୍ବାଚନ ଲଢ଼ିଥିଲେ । ନ୍ୟାୟାଳୟର ବିଚାର ଅନୁସାରେ, "ଜଣେ ବ୍ୟକ୍ତି ଜନ୍ମରୁ ଆଦିବାସୀ ହୋଇଥାଏ, ବିବାହ ପରେ ନୁହେଁ" । ତେଣୁ ତାଙ୍କୁ ଗିରଫ କରାଯାଇଥିଲା ।