Pilar Sánchez Vicente

Pilar Sánchez Vicente (11  de payares de 1961, Xixón), ye una documentalista y escritora asturiana.

Pilar ye llicenciada en xeografía y historia pola Universidá d'Uviéu. Fizo la so memoria de llicenciatura sobre La condición xurídica de la muyer na Edá Media. Ye autora de Breve historia de Asturias (Ayalga, 1986; VTP, 2006, ésta última n'asturianu). Arriendes d'esto, cuenta con numberoses publicaciones sobre documentación, turismu y mocedá. Igualmente, foi guionista y presentadora de varios programas de TVE Asturies.

La so primera incursión na novela foi con una trama d'emociones y intriga: Comadres (KRK, 2001). La so segunda obra, Gontrodo, la hija de la luna (KRK, 2005), ye una novela histórica desarrollada na Asturies del sieglu XII. En mayu del 2008 presentó la so tercer novela, La diosa contra Roma, publicada por Roca Editorial. La última obra asoleyada (2010) ye Operación Drácula, la primer incursión de l'autora nel xéneru negru, y céntrase nes mafies rumanes dientro del mundu de la prostitución.

• Pilar Sánchez Vicente, blog personal
• Entrevista para Historias de la Historia