Quick Facts
GeminiBiography
Պետրոս Հակոբի Դեմիրճյան (մայիսի 30, 1950(1950-05-30), Երևան, Հայկական ԽՍՀ, ԽՍՀՄ), հայ գրականագետ, թարգմանիչ, մանկավարժ, բանասիրական գիտությունների դոկտոր: Հայաստանի գրողների միության անդամ (1977):
Կենսագրություն
Պետրոս Դեմիրճյանը ծնվել է 1950 թվականի մայիսի 30-ին, Երևանում: Ավարտել է Երևանի պետական համալսարանի բանասիրական ֆակուլտետը: Հայաստանի գրողների միության «Գրական թերթ»-ում աշխատել է որպես գրաքննադատության բաժնի գրական աշխատող, 1972-1998 թվականներին եղել է բաժնի վարիչ: 1998-2013 թվականներին աշխատել է ՀՀ պաշտպանության նախարարության լրատվության և քարոզչության վարչությունում, ՀՀ կառավարության, ՀՀ տրանսպորտի և կապի նախարարության աշխատակազմերում՝ զբաղեցնելով հասարակության հետ կապերի բաժնի պատասխանատուի պաշտոններ: Դասավանդել է Հրաչյա Աճառյանի անվան համալսարանում: 2010 թվականից ՀՀ ԳԱԱ Մանուկ Աբեղյանի անվան գրականության ինստիտուտի ավագ գիտաշխատող է։ 2013 թվականին ընտրվել է Հայաստանի գրողների միության վարչության քարտուղար։
Գրական գործունեություն
Հեղինակ է բազմաթիվ գրականագիտական և գրաքննադատական հոդվածների, որոնք տպագրվել են հայաստանյան և օտարերկրյա մամուլում: Նա ակտիվ մասնակցություն է ունեցել Էստոնիայում հայկական մշակութային ընկերության ստեղծմանն ու գործունեությանը, ընկերության «Վահագն» թերթի հրատարակմանը: 1990 թվականին կազմել (թարգմանիչ Բաբկեն Սիմոնյանի հետ) և Բելգրադում հրատարակել է «Կնիժևնա րեչ» սերբական գրական թերթի` հայ գրականությանը նվիրված հատուկ համար (16 էջ): Հայկական ռադիոյով և հեռուստատեսությամբ վարել է «Գրական անդաստան» և «Բանավեճի ակումբ» գրական-մշակութային հաղորդաշարերը:
Անդամակցություն
- Հայաստանի գրողների միության անդամ
- Հայաստանի ժուռնալիստների միության անդամ
Երկեր
- Տիրան Չրաքյան /Ինտրա/ կամ «հեքիաթի» իրականությունը, Երևան, 2016:
- Ինտրա. Ներաշխարհ, Երևան, 2006 (կազմել և արևելահայերեն ուղղագրության է փոխադրել Պ. Դեմիրճյանը)։
- Վարք Ինտրայի, Երևան, 2003։
- Ժամանակը և գրականության զարգացումը, Երևան, 1986։
Թարգմանություններ (ռուսերենից)
- Վիտո Սանսոնե, Քարեր, որ հոգի ունեն, Երևան, 2009։
- Ա. Գալանոպուլոս, Է. Բեկոն, Ատլանտիդա. առասպելի ետևում ճշմարտությունն է, Երևան, 1985։
- Հարոլդ Դուբախ, Ռոբերտ Տաբեր, 1001 հարց օվկիանոսի մասին և 1001 պատասխան, Երևան, 1983։
- Նիկոլայ Պետրովիչ, Զրույցներ գյուտարարության մասին, Երևան, 1980։
- Վիկտոր Պեկելիս, Քո հնարավորությունները, մարդ, Երևան, 1979։
Պարգևներ
- ՀԳՄ Նիկոլ Աղբալյանի անվան մրցանակ՝ «Տիրան Չրաքյան /Ինտրա/ կամ հեքիաթի իրականությունը» մենագրության համար, 2016
- ՀԳՄ «Գրական թերթ»-ի տարեկան 1-ին մրցանակի` գրականագիտություն անվանակարգում, 2016
- Ֆրիտյոֆ Նանսենի անվան Ոսկյա հուշամեդալ, 2015
- ՀԳՄ և ՀՀ ՊՆ համատեղ մրցանակի` գրականագիտություն անվանակարգում, 2015
- ՀՀ մշակույթի նախարարության Ոսկե մեդալ, 2014
- Ռուսաստանի գրողների միության Մոսկվայի կազմակերպության Ա. Ս. Գրիբոեդովի անվան գրական մրցանակ, 2014
- Երևանի քաղաքապետի շնորհակալագիր, 2010
- «Արաբկիր համայնքի պատվավոր քաղաքացի» կոչում, 2009
- ՀԳՄ Նիկոլ Աղբալյանի անվան մրցանակ՝ «Վարք Ինտրայի» մենագրության համար, 2004
Տես նաև
- Հայաստանի գրողների միություն