Paul Theodor Kappler

Pawoł Božidar Kapler (němsce Paul Theodor Kappler; * 27. januara 1887 w Budyšinje, † 23. junija 1942 w Dorf Wehlen) bě serbski ewangelski farar a kulturny prócowar.

Narodźi so jako syn kantora Jana Awgusta Kaplerja w Budyšinje a wopytowaše tamniši gymnazij. Studowaše najprjedy w Marburgu a wot 1906 do 1912 w Lipsku ewangelsku teologiju a skutkowaše po studiju najprjedy jako duchowny w awstriskim Leobenje a potom w Bad Elster a Tirpersdorfje w Bohotskej. 1915 přewza farske městno w Hornim Wujězdźe, hdźež hač do lěta 1927 tež serbsce prědowaše. W tutym lěće sta so z fararjom Budyskeje Michałskeje wosady. 1941 bu serbski farar na ćišć nacionalsocialistow ze Serbow přesadźeny do Sakskeje Šwicy, hdźež lěto pozdźišo w starobje jenož 55 lět zemrě. Wón bu na Budyskim Michałskim kěrchowje pochowany.

Kapler bě sobustaw a wěsty čas tež starši Serbskeho prědarskeho towarstwa w Lipsku. Wot 1916 bě tež z čłonom Maćicy Serbskeje. Wot 1932 do 1934 podawaše na Budyskim gymnaziju serbšćinu.

• Gerhard Wirth: Kapler, Pawoł Božidar. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 244