Osman Asanov

Osman Asanov (1923 s. dekabr 24, Yalta, Küçükköy - 2005 s. noyabr 24, Aqmescit) – belliqırımtatar professional yırcı, calğıcı, artist ve ocadır.

Osman Asanov 1923 senesi dekabrniñ 24-ünde Yalta civarındaki Küçükköyde doğdı. Oğlançıq yaş ekende babasıbağışlağan eski mandolinanı çalmağa ögrengen Osman mektepke barğanda endi yahşı çalmağa bile edi.

Osman 1939 senesi doquzıncı sınıfnı bitirgen soñ, Aqmescitteki Çaykovskiy adına muzıka oquv yurtuna oqumağa kire. Anda o Y. Boçarov, İ. Çernov kibi professorlardan tasil aldı. Teessüf ki, apansızdan başlanğan cenk Osmannıñ arzu – ümütlerini çil – parça etti. Oquv yurtu qapatıla ve o oquvnı Yalta pedagogika oquv yurtunda devam ettire.

1944 senesi bütün qırımtatar halqı kibi olarnıñ qorantası da Özbekistanğa sürgün etile. Olar Namangan vilâyetiniñ Çust rayonına tüşeler.

1957 senesi Osman Asanov Taşkentte yañı teşkil olunğan qırımtatar oyun ve yır ansambline (soñundan o “Qaytama” dep adlandırıldı) yırcı ve çalğıcı olaraq işke davet olundı. O bu kollektivnen Qazahistan, Kavkaz, Rusiye boylap gastrollerde bulundı.

Osman Asanov "Ural dağı", "Tatarlığım", "Menim adım Seyit oğlu Seydamet" kibi halq yırlarını icra etkende adamlar ağlay ve alğışlay ediler. Onıñ bir sıra yırları gramplastinkalarğa, radio ve televideniye içün yazıp alındı.

Soñundan Osman Asanov Namangan muzıka oquv yurtunda oqudı, Taşkent konservatoriyasınıñ vokal bölügini bitirdi.

1964 senesi aileviy sebepten Ferğanağa köçip ketti ve 25 yıl devamında andaki muzıka mektebinde kemane ve muzıka nazariyesinden ders berdi.

Bugün de onıñ talebeleri Avstriya, Almaniya, Belçika, İsrail kibi memleketlerniñ belli orkestrinde çalışalar.

Osman Asanov 1991 senesi Vatanğa köçipkeldi ve mında ömrüniñ soñuna qadar bütün medeniy tedbirlerde ğayet faal iştirak etti. Bunı köz ögüne alaraq oña Ukrainada nam qazanğan artist unvanı berildi.

Soñki yıllarda o bestekâr olaraq özüni kösterdi ve öz eserlerinden tertip etilgen yırlar kitabını çıqardı.

Osman Asanov 2005 senesi noyabrniñ 24-ünde 82 yaşında vefat etti.

Amansız ölüm acayip insannı, büyük istidat saibini aramızdan alıp ketti. Osman Asanovnıñ aydın hatırası onı bilgenlerniñ yüreklerinde ebediy yaşar.