Oleg Penyaz'kov

Алег Глебавіч Пенязькоў (3 студзеня 1961, Мінск) — беларускі цеплафізік. Акадэмік Нацыянальнай акадэміі навук Беларусі (2014, член-карэспандэнт з 2009), доктар фізіка-матэматычных навук (2004).

• Скончыў Беларускі дзяржаўны ўніверсітэт імя У. І. Леніна (1987).
• З 1984 у Інстытуце цепла- і масаабмену імя А. В. Лыкава АН БССР (з 1991 АН Беларусі, з 1997 НАН Беларусі): з 2001 загадчык лабараторыі, з 2005 загадчык аддзялення, з 2006 намеснік дырэктара па навуковай рабоце, з 2011 — дырэктар.
• З 2009 галоўны рэдактар «Інжынерна-фізічнага часопіса»; з 2010 галоўны рэдактар часопіса «International Journal of Heat and mass transfer» (ЗША).

Навуковыя працы ў галіне высокатэмпературнай цеплафізікі, газавай дынамікі, фізікі гарэння і выбуху. Атрымаў прынцыпова новыя вынікі аб эвалюцыі структуры дэтанацыйных хваль у газах, сфармуляваў крытэрыі межаў дэтанацыі і дэфлаграцыі ў трубах. Усталяваў рэжымы і механізмы распаўсюджвання хуткага гарэння ў гетэрагенных сістэмах, рэжымы і крытычныя ўмовы ўзгарання газаў пры сутыкненнях ударных хваль. Вызначыў кінетычныя характарыстыкі высокатэмпературнага акіслення і раскладання газападобных і вадкіх паліваў. Распрацаваў арыгінальныя метады дыягностыкі хуткацечных працэсаў, у тым ліку ў турбулентных патоках і нізкатэмпературнай плазме. Вынікі даследаванняў маюць вялікае значэнне для развіцця тэарэтычных уяўленняў аб нераўназначных працэсах у хімічна рэагуючых неаднародных патоках, вырашэння практычных праблем стварэння прамадакладных звышгукавых, дэтанацыйных рухавікоў, рухавікоў унутранага згарання, гарэлачных прылад, у галіне пажарнай і выбуховай бяспекі.

Член Міжнароднага інстытута гарэння, Міжнароднага інстытута ўдарных хваль, Міжнароднага Цэнтра па цепла- і масаабмене, Савета дырэктароў міжнароднага Інстытута дынамікі выбухаў і рэагуючых сістэм.

Аўтар больш за 270 навуковых прац, у тым ліку 6 манаграфій (у тым ліку главы ў калектыўных манаграфіях), 8 патэнтаў.

Прэмія Нацыянальнай акадэміі навук Беларусі і Сібірскага аддзялення Расійскай акадэміі навук імя акадэміка В. А. Капцюга (2009) за цыкл прац «Фізіка-матэматычнае апісанне ўзгарання і гарэння ў гамагенных, гетэрагенных і порыстых асяроддзях: тэорыя, эксперымент, дыягностыка». Прэмія Нацыянальнай акадэміі навук Беларусі імя акадэміка А. В. Лыкава (2012) за цыкл работ «Тэарэтычныя і эксперыментальныя даследаванні радыяцыйна-газадынамічных працэсаў пры імпульсным уздзеянні на рэчыва».

Медаль «За заслугі» Федэрацыі касманаўтыкі Расіі (2014). Медаль імя праф. Тсуошы Асанумы японскага таварыства візуалізацыі (2016) за прызнанне выдатных дасягненняў у галіне візуалізацыі цячэнняў.

• Dynamics study of detonation-wave cellular structure: 1. Statistical properties of detonation wave front // Shock Waves. 2002. Vol. 11. N 4 (у суаўтарстве).
• Autoignition of surrogate fuels at elevated temperatures and pressures // Proc. Combustion Institute. 2007. N 2 (у суаўтарстве).
• Продукты сгорания жидких и газообразных топлив: образование, расчет, эксперимент. Минск: Беларус. навука, 2010. — 305 с. (у суаўтарстве).
• High temperature measurement in fast phenomena by spectrometry of photoelectrons. // High temperatures — High Pressures. 2012. Vol. 44, N 5 (у суаўтарстве).
• Droplet evaporation on a substrate at the final stage of Low Pressure Spray Pyrolysis and the final morphology of nanoparticles. // Int. J. Heat Mass Transfer. 2014. Vol. 78.
• Self-ignition and explosion of a 13-MPa pressurized unsteady hydrogen jet under atmospheric conditions. // Int. J. Hydrogen Energy 2015. Vol. 40, N 16.
• Analysis of the actual thermodynamic cycle of the detonation engine // Applied thermal engineering. 2016. Vol. 107 (у суаўтарстве).

• ПЕНЯЗЬКОЎ Алег Глебавіч на сайце НАН Беларусі
• Алег Глебавіч Пенязькоў у базе даных «История белорусской науки в лицах» Цэнтральнай навуковай бібліятэкі імя Якуба Коласа НАН Беларусі(руск.)
• Алег Глебавіч Пенязькоў на сайце анлайн-энцыклапедыі «Беларусь у асобах і падзеях»