Quick Facts
Biography
Si Nilo P. Aureus (namundag, Marso 25, 1955) sarong Bikolanong negosyante, parapapublikar nin peryodiko. Siya an kagtogdas asin kagsadiri kan Goldprint Publishing House, sarong imprentahan namomogtak sa Concepcion Grande, ciudad nin Naga asin siya an presenteng tagapagpalagda' kan peryodikong Bicol Mail.
An mga magurang niya iyo sinda Tomas Aureusasin Felicidad Portes, na arog niya pareho namundag sa Libmanan. An ama niyang si Tomas tugang ni Leon SA. Aureus. Igwa siyang pitong tugang: si Marita, Jesus (+), Celedonio, Tomas, Jr., (+), Arturo, Daniel, asin si Edita. Naagom si Julieta de la Cruz, igwa sindang duwang aki, si Laurens Melvin (25) asin si Neil Ceasar (31).
Edukasyon
Nagkua siya kan saiyang elementarya sa Libmanan Elementary School, haiskul sa Bicol Central Academy, asin sa University of Nueva Caceres nagtapos siya kan kursong BS in Commerce.
Karera
Pakagraduar dagos siya nag'empleo sa AMS Press kun saen siya nagin proofreader, assistant manager, dangan mismong manager kan nasabing imprentahan.
Nagkinse anyos siya sa saiyang trabaho asin ini nagin hustong adal para saiya na nagtaong kusogboot saiya na magpundar kan sadiri niyang imprentahan, an Goldprint Publishing House. Tinogdas niya ini kan taon 1990. Ngonyan an saiyang imprentahan moderno an mga gamit, may offset, may digital na mga makina asin gamit sa separation. Nagtatao man ini nin trabaho sa 22 katawo.
Mga pig'ayonan na mga organisasyon
Kaapil man siya sa magkapirang organisasyon siring kan Naga City Chamber of Commerce, kan Jaycees International asin kan Lions International. Myembro man siya sa duwang propesyonal na kasararoan, an Publishers Association of the Philippines asin kan Philippine Printing Association of the Philippines.